Bøkko tok fjerdeplassen i allround-EM

Håvard Bøkko var fornøgd med 4.-plassen i EM allround i Italia.

Bøkko vart intervjua av NRK etter 1500 meteren sundag, der holingen vart nummer fire med 1.47,74. Då innsåg han at det var for langt opp til medaljeplass.

- Eg er fornøgd viss eg greier halde på 4.-plassen, sa Bøkko.

Det greidde han. På 10.000-meteren gjekk Bøkko på 13.43,26. Det gav 5.-plass på distansen.

Suverene Kramer

Den som trudde at Sven Kramers tid er over på skøytebanen, må tru om att. I Italia var nederlendaren sterk.

Han vann 1500 meter på 1.45,92 og var berre hundredelar frå å ta sigeren på 10.000 meter. Den distansen vann Patrick Roest, Nederland på 13.26,46.

Samanlagt vann Kramer framfor Roest, og med Sverre Lunde Pedersen på tredjeplass. Pedersen vart nummer tre på 1500 meter og fire på 10.000.

Bøkko tok altså fjerdeplassen samanlagt.

Hege Bøkko skuffa

I kvinnenes sprint-EM gjekk det ikkje heil slik Hege Bøkko hadde håpa. Etter fyrste dag låg Bøkko på 8.-plass.

Sundag vart det ny 8.-plass på 500 meter med tida 38,95. Seinare gjekk ho inn til 9.-plass på 1000 meter. Tida vart 1.18,81.

- Hege må heim å jobbe. Ho har mangla energi under sprint-EM, uttalte NRK-kommentatorane etter at meisterskapen var over.

Hege Bøkko vart nummer åtte samanlagt. Vanessa Herzog frå Austerrike tok EM-tittelen.