Bankranet som podkast: – Det er ikkje berre spenning, sjokk og «true-crime», men også personlege historier

Korleis er det å vere i eit lokale som blir utsett for ran? Det blir skildra i Hallingdølens ferske podkast «Bankranet i Hemsedal».

Som ein del av «Røynda», Hallingdølens historieforteljande podkast, kjem no «Bankranet i Hemsedal». Historia om kva som skjedde i Hemsedal Sparebank 13. desember 2002, og jakta på ranarane som vart gjort av lokalt politi blir for fyrste gong presentert i lydformat.

– Då me starta med Røynda jakta me spesielle historier i Hallingdal. Med min bakgrunn som fotojournalist har biletarkivet til Hallingdølen vore ei viktig kjelde. Der dukka dette ranet opp for fyrste gang for meg.

– Var veldig gira

Det seier journalist Elias Dahlen som denne veka legg siste hand på verket på to podkast-episodar om bankranet i Hemsedal.

– Sjølv om me landa på å lage den fyrste podkasten om trippeldrapet på Geilo har denne historia heile tida vore bak i hjernen. Eg hadde lenge ein teori om at saka hadde bindeledd til NOKAS-ranet, seier han.

– Når me vart ferdig med prosjektet og podkasten frå skredet i Hol til påske hadde eg lese meir om ranet. Eg var veldig gira. Det er ei historie verdt å lage.

Dahlen seier du i løpet av to episodar får høyre frå dei som var i banken 13. desember 2002, då to maskerte menn på brutalt vis stakk av med 100.000 kroner i kontantar.

– Det er så vidt eg veit eit av veldig få ran som fann stad ute i distriktet med folk frå ransmiljøet i Oslo, og den bølga som slutta etter NOKAS-ranet.

Høyr podkasten her:

Løyste saka lokalt

I tillegg får du historia om Gol og Hemsedal lensmannskontor som sjølv tok jobben med å etterforske saka.

– Og dei løyste det. Utan bistand. Det er nok ganske unik. Det einaste dei fekk hjelp til var å gjennomføre avhøyr.

– Ikkje berre spenning og sjokk

I tillegg til den dramatiske hendinga har Dahlen, som for fyrste gong har produsert ein podkast åleine, valt å fokusere på dei personlege skjebnane.

– Å diskutere med seg sjølv reint kreativt kan jo vera utfordrande, men eg føler at historia gir deg noko.

– Det er ikkje berre spenning, sjokk og «true-crime», men også personlege historier som blir løfta. Eg håpar eg har klart å få det fram.

– Kven høyrer me frå?

– Dei som var i banken, primært Unni (Mythe red. merk.) som sat i skranken. Ho vart sparka og kommandert. Hendinga prega livet hennar etterpå. Me får også høyre frå sikkerheitsansvarleg på den tida, som hadde ansvaret for rutinane i banken.

Også to politimenn blir intervjua i podkasten; Bent Øye og Espen Mjølid.

– Øye har same stilling i politiet no som då. Mjølid, som var hovudetterforskar i saka, vart så engasjert at han jobba ei periode i ransavsnittet i Oslo.

– Er det historie som kjem til å vekke minner hjå hallingane?

– Det er i kvart fall ei historie mange i Hemsedal hugsar. Banken ligg rett over Hemsedal Cafe, og det var mange vitne til hendinga.

Podkasten «Bankranet i Hemsedal» kjem ut i helga og er gratis der du høyrer podkast. Alt no kan du høyre ein smakebit: