Åtte vil bli rådmann i Hemsedal

To rådmenn er blant dei åtte som har søkt rådmannsjobb i Hemsedal. Minst tre søkjarar er lokale.

Sveinung Halbjørhus gir seg som rådmann i Hemsedal 1. august.

Då søknadsfristen for å overta jobben gjekk ut 10. juni, var det kome åtte søkjarar. Fem er menn og tre kvinner.

Minst tre lokale

Det er fleire lokale namn blant søkjarane. Ann Jørgensen bur i Hemsedal og er samfunns- og næringsutviklar i Nes kommune. Gry Herland både bur og arbeidar i Hemsedal. Ho er dagleg leiar ved Hemsedal statleg mottak. Ho har søkt på jobben også tidlegare. Leon Grinde er busett i Nes. Den tidlegare høgrepolitikaren søkte også på rådmannsjobben i Nes i 2008.

Namnet til ein av søkjarane, ein mann på 37 år, var fredag enno ikkje offentleggjort. Søknaden om slikt unntak var då til vurdering.

Her er søkjarlista:

* Erik Eiknersson Eichner (45), Nordagutu

* Leon Grinde (54), Nesbyen

* Gry Herland (47), Hemsedal

* Thore Hopperstad (51), Træna

* Ann Jørgensen (52), Hemsedal

* Lars Gunnar Marken (33), Rørvik

* Inga Sørensen (49), Havøysund

To rådmenn

Måsøy kommune har hatt Inga Sørensen som rådmann og økonomisjef sidan april 2014. Også Thore Hopperstad starta i jobben som rådmann i fjor, i Karasjok.

Erik Eiknersson Eichner er i dag studieleiar ved master- og etter- og vidareutdanningane ved Høyskolen Diakonova. Lars Gunnar Marken har bakgrunn frå politikken, gjennom partiet Venstre. Han har også arbeidd med hjelpearbeid i Kviterussland.