Arrestert i Danmark etter valdshending - fengsla i fire veker
Ein litauer i 30-åra har vore på rømmen etter ei valdshending i Hol tidlegare i vinter.
Etter å ha vore etterlyst internasjonalt vart han pågripen på grensa mellom Tyskland og Danmark i påska. No er han tilbake i Norge.
– Mannen vart henta av norsk politi onsdag, og blir framstilt for fengsling i Drammen torsdag klokka 14:00, opplyste politiadvokat Gülcan Øzalp ved 12-tida torsdag.
Artikkelen held fram under annonsen.
Seinare på dagen vart det stadfesta at mannen blir fengsla i fire veker.
Kjende kvarandre
Det var i desember i fjor valdshendinga skjedde. Ein mann i 50 åra, også han frå Aust-Europa, vart utsett for valdshandlingar og sendt til sjukehus med alvorlege skader.
Både fornærma og sikta var i Hallingdal for å jobbe, og dei skal ifølgje politiet ha kjent kvarandre.
Politiet har vore sparsame med opplysningar rundt sjølve hendinga i og med at sikta ikkje har vore avhøyrt. Den sikta reiste nemleg frå landet kort tid etter hendinga.
Samtykte
Han vart etterlyst internasjonalt, og i påska vart mannen pågripen då han var på veg frå Tyskland til Danmark.
– Mannen samtykte i utlevering til Norge, opplyser politiadvokat Øzalp. Ho fortel at pågripinga skjedde utan dramatikk.
Han har site i varetekt i Danmark inntil onsdag då norsk politi tok han med til Norge.
– Alvorleg sikting
Mannen vart framstilt for fengsling torsdag klokka 14:00, med krav om fire vekers varetekt med brev- og besøksforbod.
Artikkelen held fram under annonsen.
Politiet fekk medhald i fengslinga.
– Kva kan du seie om siktinga?
– Han har ei alvorleg sikting mot seg, som ikkje har vorte svekt. Den går ut på å ha påført den fornærma kroppsskade, opplyser Gülcan Øzalp.