78 personar vart evakuert på grunn av rasfare - har fått lov å vende heim: – Ikkje fare for nye skred
Alle bebuarar i Breie og Tune fekk beskjed om å evakuere seg sjølv. Sundag kveld kunne dei reise heim - om dei sjølv ville.
– Det er ikkje fare for nye skred. Dei får lov å reise heim, men nokon tek imot tilbodet om å overnatte på hotellet til i morgon, seier ordførar Solveig Vestenfor til Hallingdølen klokka 18.30.
– Eg opplever at dei er takksame for at me evakuerte dei, og eg har fått beskjed om å helse kriseleiinga og seie at dei føler seg tatt vare på. Det er den viktigaste jobben me har.
Artikkelen held fram under annonsen.
Ein geolog reiste sundag ettermiddag inn i terrenget med helikopter for å kartlegge rasfaren. Det var etter denne synfaringa folk fekk grønt lys til å reise heim. Men dei fekk bestemme sjølv - klokka 19 fekk dei servert middag, så var det opp til kvar enkelt å avgjere kor dei ville tilbringe natta.
– Vatnet går ned, og for Ål sin del vil vasstanden truleg i løpet av morgondagen ha gått ned til det nivået det har lege på i det siste, seier Vestenfor.
– Geologen seier elles at rasfaren i Breie og Tune ikkje er større no enn den elles er.
Tvungen evakuering
Bebuarane i Breie og Tune, og enkelte andre husstandar, fekk sms frå kommunen ved 12-tida sundag om at dei skulle evakuere seg sjølv til Thon Hotell. Røde Kors reiste inn i grenda, som vart råka av store ras for nokre veker sidan, for å hjelpe til.
– Dette er ei tvungen evakuering, sa Vestenfor. I alt vart 78 personar evakuert.
Det var ingen akutt fare for nye ras, men om bekkar tok nye vegar frykta kommunen skred.
Ein geolog var ute i terrenget i fleire omgangar sundag. Ål er no på oransje nivå for rasfare, det er karakterisert som ein alvorleg situasjon.
Ifølgje geologen var vassmengda i Breie og Tune omtrent som den har vore den siste tida, mens andre plassar såg det ut til å vere på veg ned.
Artikkelen held fram under annonsen.
Trøbbel med nett
Under ekstremvêret Hans for nokre veker sidan forsvann mobildekninga i Ål då folk skulle evakuerast. Denne gongen har det gått betre, men ein basestasjon på Torpo vart meldt å vere nede. Nettet kan derfor vere noko ustabilt mellom Gol og Ål.
– Me er i kontakt med Telenor om dette, seier Vestenfor.
Om nettet skulle ramle ned, vil det kome meldingar via Radio Hallingdal. Frekvensen i Ål sentrum er 106,7.
Losne steinar
Laurdag melde kommunen at regnet kan skape utfordringar, særleg i dei områda det gjekk skred tidlegare denne månaden.
– Det kan moglegvis losne nokre lausmassar eller steinar der det gjekk skred under ekstremværet «Hans». Ein bør difor halde avstand til desse skreda, poengterer kommunen.
Bilete 1 av 7
Stikkrenne under fylkesveg 244, ved Nordbygdvegen 134/137 er tett. Det fløymer vatn nedover vegen og det skaper trøbbel, fortalde Marit Sollien Høgberg sundag ettermiddag.Bilete 2 av 7
Stikkrenne under fylkesveg 244, ved Nordbygdvegen 134/137 er tett. Det fløymer vatn nedover vegen og det skaper trøbbel, fortalde Marit Sollien Høgberg sundag ettermiddag.Bilete 3 av 7
Den vanlegvis så idylliske Bergstigen i Ål sentrum såg sundag meir ut som ei elv enn ein veg.Bilete 4 av 7
Nederst i Øvre-Ålsvegen i Ål sentrum sundag etteemiddag.Bilete 5 av 7
Skadene etter ekstrwmvêret "Hans" synest framleis godt, og sundag hadde igjen vatnet funne nye vegar, som her ved Klokkarbakken i Ål sentrum.Bilete 6 av 7
Bekkar i Ål sentrum, som vanlegvis er små og beskjedne, fossar igjen over breiddene sine. Og vatn finn nye vehar, som under ekstremvêret "Hans". Biletet er frå Myrovegen sundag føremiddag.Bilete 7 av 7
Skadene etter ekstremvêret "Hans" synest framleis godt, og sundag hadde igjen vatnet funne nye vegar, som her ved Klokkarbakken i Ål sentrum.Ein minner folk på å følgje godt med der bekkane har teke nye vegar og kor det ikkje har vorte utbetra enda. Det er også viktig å halde eksisterande bekkar, stikkrenner og sluk frie.
– Me gjer merksam på at vannstanden i vassdraga kan stige raskt, og ber om at det blir utvist nødvendig aktsemd, skriv Ål kommune.
