Politi som symbol i distriktspolitikken

Regjeringa vil opprette politikontor i Hemsedal. Politiet derimot, vil heller ha fleire patruljar framfor å leige eit lokale som risikerer å bli ståande tomt, eller å stresse bemanninga.

Neste år skal det opprettast 20 nye tenestestader rundt i landet, blant anna i Hemsedal. No ventar etaten på kva desse skal innehalde. Skal det vera eit «lensmannskontor» ope på bestemte tider på dagtid, eller skal det vera noko heilt anna?

Spør politistasjonssjef i Hallingdal, Brit Fyksen. Ho er nøgd med dagens ordning. To tenestestader, på Geilo og i Nesbyen som er opne ein dag i veka, i tillegg til Gol som er ope fem dagar.

Det ho treng meir av er politi når det er mykje folk i bygdene, Altså patruljar i helgene. Ikkje endå eitt kontor som er ope litt på dagtid.

Striden om tenestestader gjeld heile landet. Politiet ynskjer ikkje desse 20 nye kontora, og politiforbundet melder om 19 kontor, som i dag står heilt tomme. I tillegg minner forbundet om at rundt 30 kontor berre er bemanna av ein eller to personar.

Nokre av desse siste er det også grunn til å behalde. I eit stort land må det til nokre små politikontor, for å unngå at avstandane til etaten blir for store. I denne kategorien finn me kontoret i Nore og Uvdal som etter ei tid med kamp og usikkerheit, no har fire tilsette.

Senterpartiet er pådrivaren for dei nye kontora, som etaten ikkje vil ha. Sp-ordførar Pål Rørby i Hemsedal ynskjer seg eigne oppgåver og oppdrag lagt til ein ny tenestestad i bygda. Han minner også om at departementet seier tilboda ved dei nye tenestestadene skal koma i tillegg til andre lokale tilbod.

Hallingdølen meiner dette er ynskjetenking både frå ordføraren i Hemsedal og frå regjeringa.

Symbolpolitikk er det også. For det blir berre feil når den politiske leiinga over- og detaljstyrer politiet til å leige inn kontorlokale etaten ikkje vil ha.