Storstilt UKM-fest

Numedalshallen var fylt med 70 unge songarar, musikarar, dansarar og kunstnarar under Ungdommens kulturmønstring.

Det var stor stemning, full sal og mange spente scenedebutantar i storstova i Numedal under Ungdommens kulturmønstring sist laurdag.

Felles kulturmønstring

Dei tre kommunane i Numedal har hatt felles lokal kulturmønstring sidan før tusenårsskiftet. Den tradisjonen vart ikkje broten det 30. året UKM blir avvikla.

– Ein ungdomsleiar frå kvar kommune er arrangementskomite. Me skiftar på vertskapsrolla, i år var det vår tur, seier Solfrid Holtan i Rollag.

Ho peikar på fleire fordelar med fellesmønstringa.

– Det tekniske apparatet med lyd og lys er det same om det er ei eller tre mønstringar. Den sosiale delen er også viktig. Ungdommane blir kjent med kvarandre, seier Holtan.

70 aktørar – 31 innslag

At kulturlivet i Numedal blomstrar og går lyse tider i møte, er kulturmønstringa eit godt bevis på. 70 aktørar deltok med til saman 31 innslag fordelt på song, musikk, dans, biletkunst og sceneteknikk.

– Det var svært høgt nivå på mange av innslaga. Størst stemning og lydnivå var det nok då 20 barn i barnegruppa var på scenen, seier Holtan.

I Ungdommens kulturmønstring blir det ikkje kåra vinnarar og taparar. Juryen hadde ein vrien jobb med å plukke ut dei som skal delta i fylkesmønstringa.