Refs i bokform

Bokaktuelle og brageprisnominerte Kyrre Andreassen kjem til Rødberg bibliotek.

Planen var at Rødberg-forfattaren skulle kome til forfattarmøte på biblioteket i Nore og Uvdal alt i november i fjor, men nominasjonen til Brageprisen for den siste romanen «For øvrig meiner jeg at Karthago bør ødelegges» gjorde at arrangementet vart utsett.

Rødberg biblioteks venner, som går under namnet «Det er her du har venna dine», har no funne ein ny dato for forfattarmøtet. Foreninga ber same namn som debutboka til Andreassen. Venneforeininga vart skipa nettopp for å vera ei støtte for biblioteket og tilby kulturelle opplevingar. Arrangementet går av stabelen 15. februar.

Andreassen har skrive fleire romanar, noveller og skodespel. Den siste boka handlar om ein elektrikar med ryggprolaps som blir omplassert som lærar for flyktningar. Han ser det som si oppgåve å avsløre og refse samtida og medmenneska sine. Både stivbeint byråkrati, unnasluntring og allmenn dumskap. Dette er ein roman om å vite betre, men aldri få rett. Om å skjøne systemet, men aldri få overtaket. Andreassen har jobba med boka sidan den førre kom ut i 2006. Han er busett i Drammen og jobbar som litterær lausarbeidar i tillegg til å vera lærar for forfattarlinja ved Buskerud Folkehøgskole på Darbu.