Her får du historiske glimt - bygging, optimisme og elefantar som streikar

Gol sentrum gjennom fem tiår, frå tretti- til åttitalet, er tema for årets utgåve av kalenderen til Gol historielag. I denne utgåva finn me nybygg som, trass i mange endringar opp gjennom åra, framleis pregar bygda.

Sjølv om utgangspunktet ikkje var å ha eit spesifikt tema for kalenderen denne gongen, så er det ikkje tilfeldig at det vart mange hus.

– Me har gjort eit utval av bilete frå 1930-talet til 1970-talet. Det er ikkje tilfeldig at de vil finne ein god del bilete av bygningar i Gol sentrum slik dei ein gong var, og informasjon om kva som har vore i desse husa opp gjennom åra. Me synest det er viktig å få dokumentert dette før alt går i gløymeboka, etter kvart som eit nytt sentrum veks opp i Gol.

Det fortel Liv Rosén. Ho har vore ansvarleg for utarbeiding av kalenderen saman med Wigger Liahagen, Torstein Brøto og Maiken Berntsen. Dei jobbar alle som frivillige i Gol bygdearkiv.

Fleire av bileta gir også fin oversikt over korleis enkelte område av Gol såg ut i ulike deler av den nære fortida. Tekstane er svært informative. Med eit par unntak handlar bileta om svartkvitt, og dei fleste er tekne av profesjonelle fotografar, noko som er lett synleg i kvaliteten.

Fire av bileta stammar frå Gols eigen Hjørdis Bråten som var aktiv med fotoatelier og forretning fram til 1956. Også andre lokale fotografar som ålingane Strand og Johs. Brye er representert. Det same er Widerøe flyfoto og Normanns kunstforlag.