Går i gang med julestria
Treng du ein dytt for å kome i mål med sju slag, eller kunne du tenkt deg å legge kortreiste gåver under treet?
Laurdag inviterer Nore Bygdekvinnelag og bygdeinitiativet Bu i Nore inn til julemarknad og juleverkstad. Her skal det vera noko som passar for alle.
Kortreiste varer
I Norehallen vil julemarknaden halde hus. Det er tredje året Bu i Nore tok over stafettpinnen for julemarknaden. Her blir det mogleg å sikre seg både handfarga garn, strikk- og vevsprodukt, keramikk, skinn og andre typar handarbeid og brukskunst.
Artikkelen held fram under annonsen.
Nokre ungar har eigen stand der dei sel mellom anna leiker og perlebilete, i tillegg kjem Matopplevelser i Numedal for å bidra på matfronten. Totalt blir det 15 utstillarar, som har med seg varer som er laga lokalt, fortel Gunnhild Kjøntvedt i Bu i Nore.
Lagar noringssnipp
Inne på skulekjøkenet på Nore skule vil det i år vera juleverkstad som bygdekvinnelaget står for. Dei hjelper deg i gang med julebaksten og har med seg ferdig deig til noringssnipp. Tek du med deg eige forkle, er det berre å bli med.