Ei reise i sogene si verd

Laurdag vart grunnlovsjubileet hylla under Folkemusikkveka på Ål. Eldgrim Springgard har skrive manuset til «Kong Nor».

– Det er artig å sjå at teksten får liv på scena, seier Eldgrim Springgard.

Gamal myte

Han har skrive manuset til «Kong Nor» som laurdag kveld hadde framsyning i storsalen på Ål kulturhus. Nyproduksjonen er ein folkemusikalsk hyllest til grunnlovsjubileet, og byggjer på myten om segnkongen Nor som for tusen år sidan samla det norske riket. Framsyninga på Ål var ein del av programmet under Folkemusikkveka.

Attende til start

– Historia om Nor forsvann i nasjonsbyggingstida på 1800-talet. Ho vart sett på som ei litt eventyraktig myte og gjekk i gløymeboka. At ho no blir trekt fram att, og at me kan trekkje historia attende til oppstarten på riket Norge og ikkje berre 200 år tilbake i tid, er artig, seier Springgard.

Dovreliv

Publikum i kulturhuset fekk oppleve ei spanande blanding av musikk, dans, song og forteljing laurdag kveld. Jotnesonane Nor og Gor si søken etter den tapte systera Goe, fører dei over havet og over fjellet – og til slutt til Dovrefjell der Kong Svade heldt til. Der blir det inngått ei inndeling av Dovreverda.

– Nye vegar

– Regissør Leif Stinnerbom nyttar dansen svært scenisk i sin regi. Det er eit teateruttrykk eg likar veldig godt. Samstundes er det spanande å sjå korleis teksten tek nye vegar når han blir framført på scena. Då har ein instruktør jobba med teksten og lagt sitt i han. Det er det som gjer manusarbeid så spanande, seier Springgard.