Bandet X overraskar
Det tok fem år for Bandet X å lage plata «Black & White».
«It is a treasure, to be found» syng Yngve Klevjer i låten «Certain light». Det er i grunn ganske så dekkjande. Bak eit litt abstrakt ytre skjuler det seg nemleg glitrande musikk, med fengjande melodiar og underfundige tekstar.
Bandet X er Gaute Bakken Sundt (song/kor/gitar), Jørgen Flesvik (song/kor/trommer), Yngve Klejver (song/kor/gitar) og Jørn Andre Sundt (bass/kor). Karane har spelt saman i ulike samanhengar sidan først på 90-talet. Som «Bandet X» har dei jobba i lag sidan 2007. No er plata klar.
Artikkelen held fram under annonsen.
Første låt ut er «On the morning train», ei countryinspirert, skeiv rockelåt. Refrenget i låt nummer to «Through the darkness and the rain» får deg lett til å synge med. Det er god driv i nummer tre – «White horse», og slik kunne ein halde fram. Plata er gjennom alle sine 11 kutt svært variert, med eit gjennomgåande upretensiøst preg. Alt er sjølvskrive og vokalist-rolla går på omgang, alt etter kven som er opphavsmann.
Assosiasjonane er mange. Musikalsk svinsar den innom både britisk punk, tidleg R. E. M. og litt ruskete Rolling Stones. Ein personleg favoritt er «Bagger man» som har litt Dylan over seg.
Black & White er spelt inn heime hjå Jørgen Flesvik på Nesbyen, og produsert av Herbrand Larsen i Earshot & Conlave Studios Bergen. Larsen har også lagt på keyboard, gitar og kor. Det har nok bidrege til å løfte denne produksjonen til nye høgder. Like fullt er grunnstoffa i denne blandinga både spennande og gode.
Bandet X har før utgjevinga berre eit par konsertar på samvitet. På «Black & White» er det fleire låtar som skrik etter å bli framført for eit publikum. I mellomtida kan dei no kjøpe plata på utvalde stader i Nes og frå 7. desember digitalt via fleire musikkportalar.
Det manipulerte campingbordet i svart/kvitt på omslaget er visst meint som ei slags årsaking for at dei lånte det av Ivar Sundt, litt i lengste laget. Det er uansett ikkje nødvendig å vente nye fem år på plate nummer to.
