Rustar opp Hallingmo for ein million

Gol kommune satsar vidare på idrettsanlegga. No blir friidrettsbanen på Hallingmo rusta opp.

Arbeidet kostar om lag ein million kroner.

– Me er veldig glade for at dette blir gjort. Det var godt på overtid, seier dagleg leiar i Gol idrettslag, Arve Rustberggard.

Forfall

Sentralidrettsanlegget, eller Hallingmo idrettspark som det vart heitande, vart opna i 1986.

I 1990 var anlegget fullt utbygd med tribunar og speakerbu. Då var den gamle draumen idretten i Gol hadde hatt sidan krigen oppfylt. No vart idretten samla kring skulane og samfunnshuset. Som ein av fire banar i Buskerud fekk anlegget kunstgras for fotball. Og anlegget fekk som det andre i Hallingdal etter Nesbyen i 1983, kunststoffdekke for friidrett. Men sidan opninga har løpebanane forfalle. Dekket har gjennom 32 år vorte nedslite og fleire stader har det vore stygge hakk.

Lite friidrett

Men no blir anlegget rehabilitert.

– Skader blir reparert og det skal leggast eit topplag på fire mm. Så blir banen måla opp att, seier Mads Elbrønd i Gol kommune.

Arbeidet har vorte utsett i to år. Ein av grunnane til det er at det har vorte diskutert om Hallingmo var aktuell som skøytebane. Det er den ikkje. Så spørst det, då, om Gol klarar å rekruttere sine idrettsungdommar til friidrett. Då banen vart opna i 1986, hadde Gol eit lite friidrettsmiljø. Seinare gjekk Gol saman med Ål og Flå og starta Hallingdal Friidrettsklubb, som no er nedlagt.

– Me har inga aktiv gruppe. Men anlegget har likevel stor betydning for idrettslaget og skulane som er flittige brukarar av banen, seier Rustberggard.