Til kamp mot useriøse handverkarar
Hol kommune trappar opp kampen mot arbeidslivskriminalitet. Som tredje kommune i landet skal Hol samarbeide med politiet og Skatteetaten.
Prosjektet «Tett på» er eit førebyggande tiltak politiet og Skatteetaten gjennomfører i samarbeid med kommunar.
Det første vart sett i gang i Trondheim med gode resultat. No er dei to store hyttekommunane Hol og Sigdal dei neste som blir med.
Artikkelen held fram under annonsen.
– Hol var ein naturleg kommune å starte med. Det kan bli aktuelt å utvide til fleire kommunar i Hallingdal, seier næringslivskontakt Jarl Martin Pedersen i Sør-Øst politidistrikt.
Førebygging
Kjernen i det førebyggande prosjektet er denne:
Hus- og hyttekjøparar skal få informasjon, råd og rettleiing i valet av handverkarar. Generelt er det mange useriøse aktørar i byggemarknaden, og målet er å krympe denne gruppa. Ein analyse i Sør-Øst politidistrikt i fjor viste at det var behov for tettare oppfølging. I tillegg til at hus- og hyttekjøparar eller dei som sender byggesøknad blir kontakta, kan det bli aktuelt å halde informasjonsmøte med lokalt næringsliv og velforeiningar. I tillegg til politiet og Skatteetaten støttar NAV og Arbeidstilsynet prosjektet.
– Erfaringane er at dette gir gode resultat. Dei som blir kontakta, er fornøgde, seier Pedersen.
Auka kunnskap
Ordførar i Hol, Petter Rukke, ser fram til samarbeidet.
– Intensjonane er gode. Me skal ikkje ta nokon, men førebygge.
Rukke trur kunnskapen og rettleiinga utbyggarar, hus- og hyttekjøparar får gjennom prosjektet vil vere til stor nytte.
– Me ønskjer gode miljø i byggebransjen, og dei fleste driv seriøst. Dette kan vere nyttig, og me kan komme i forkant av problemstillingane som kan dukke opp, seier Rukke, og siktar til dei mange sakene som denne sommaren har vorte rulla opp.
Artikkelen held fram under annonsen.
– Dårleg reklame
For etter den alvorlege leilegheitsbrannen på Geilo i mai, har Hol kommune auka kontrollar av bygg denne sommaren.
Ifølgje leiar i plan og bygg, Trond B. Augunset, har kommunen aldri før gjennomført så mange tilsyn med så strenge reaksjonar som i år. I kommunestyret onsdag fekk dei skryt for arbeidet. Petter Braaten (H) viste til oppslaget i Hallingdølen forrige laurdag om arbeidarane på Kikut Fjellstue som budde blant søppel og avfall på ein eigen arbeidsplass. Braaten understreka at slike forhold ikkje er akseptable.
– Det er gledeleg at kommunen skjerpar kontrollane. Dette er dårleg reklame, sa Braaten.