Måtte avlive avmagra elg
Måndag ettermiddag vart ein elg avliva like ved Rv7 på Rotneim.
Elgen hadde ligge i snøen i fleire timar då han vart avliva.
– Elgen var kraftig avmagra. Han hadde lagt seg ned i snøen og hadde ingen planar om å bevege seg, seier leiar i viltnemnda i Gol, Paul Ole Kleven.
Artikkelen held fram under annonsen.
Barsk vinter
Snøen og kulda skapar trøbbel for hjortevilt som elg og rådyr.
Viltforvaltar i Gol kommune, Jørn Magne Forland, peikar på at dyra brukar mykje energi på å ta seg fram i snøen. Kulda gjer at dei må halde kroppen i gang, men maten dei finn i osp, selje og rogn er skrinn. Kleven meiner elgen som vart avliva måndag er eit resultat av ein snørik vinter.
– Det er ein forholdsvis barsk vinter, som det er lenge sidan me har hatt. Og med bakgrunn i skrantesjuka er all fôring av hjortevilt forbode. Det fører til at hjorteviltet må finne mat på andre måtar, seier Kleven.
Denne tida på året er kritisk for hjorteviltet.
– Ettervinteren er den kritiske tida. Då er feittreservane brukt opp. Det vil føre til at svake og sjuke dyr bukkar under på denne tida, seier Kleven.
– Ver merksam
– Rykker viltnemnda ut på mange slike oppdrag?
– Dette er den første elgen i vinter. Men eg såg ein liten kalv ved Torpomoen sist veke. Då tenkte eg at «denne blir ikkje gamal», seier Kleven, som elles har mange utrykkingar til påkøyrsler.
– Så å seie all elg trekkjer ned i dalbotnen og er ein fare for bil og tog. Seinast tysdag kveld og onsdag morgon var me ute på elgpåkøyrsler på Hemsedalsvegen og i Herad.
Artikkelen held fram under annonsen.
Kleven oppmodar bilistar til å vere merksame langs vegen.
– Bilistane må vere forsiktige og ikkje berre stire rett fram i vegen.