Har drive eitt år - med suksess: – Interessa veks for å tene pengar på fritidsbustaden
I fjor vart Hallingdal Rental Hub etablert. Eit år seinare ligg dei over budsjettet.
Firmaet som spesialiserer seg på å gjere utleige av hytter og bustader enklare går inn i sin andre sesong i Hallingdal. Dei var etablerte i Hallingdal etter suksess i Lofoten med same konsept. I Hallingdal har dei primært fokus på vintersesongen.
– Me får stadig nye kundar. Og ser at interessa for å tene pengar på fritidsbustaden veks i takt med auka utgifter i samfunnet, seier dagleg leiar Andreas Gallefoss.
Artikkelen held fram under annonsen.
– Nye kundar kvar veke
Firmaet som har hovudvekt av kundane sine på Geilo, tilbyr tenester som gjer det enklare å leige ut hytter, leilegheiter eller hus. Firmaet tek seg av vasking, kundekontakt og det praktiske.
I tillegg til Geilo har dei kundar i Gol, Torpo og Hemsedal.
– Det melder seg nye kundar kvar veke. Det kjem til å gje oss ein hyggeleg vekst til vinteren.
Likevel er det fyrst til vinteren dei vil sjå resultat av auken.
– Starten har vore betre enn me hadde sett for oss. Inne i systemet ligg det no opp mot 90 kundar, og det er over budsjettet, opplyser han.
Han fortel at budsjettet innfor vintersesongen er over 50 fullservice-kundar, som vil seie kundar dei leige ut for, òg vaskar. Nokon kundar nyttar også selskapet berre for vasking.
Det er eit mål han trur dei klarer.
– Berre denne veka hadde me fire-fem bestillingar for juleferien, seier han.
Artikkelen held fram under annonsen.
Femti/femti
Selskapet nyttar ulike nettbaserte utleigesider, som til dømes Airbnb og booking.com, for å marknadsføre kundane sine. Og fleire utleigeobjekt blir tidleg reservert.
– Dei objekta me hadde tilgjengeleg i sommar, var alt reservert i mars. Og me ser at fleire har reservert inn til vinteren allereie no, seier Gallefoss.
Dei som bookar er femti/femti nordmenn og utlendingar.
– Men 75 prosent av dei som reserverer på førehand er utanlandske turistar.