Søkjer om å starte tre asylmottak i Hallingdal: – Me har kapasitet til å drifte alle

Selskapet Amdo AS søkjer om å drifte fire asylmottak i Hallingdal og Valdres.

Det stadfestar styreleiar i selskapet, Odd Ustad. Dei har søkt UDI om å drifte mottak ved Torpo Gjestegård i Ål, Valdres Høyfjellshotell, Hallingen Høyfjellshotell i Gol og Skogstad Hotell i Hemsedal.

– Me har jobba ei god stund med å finne eigna lokale, inngått leigeavtalar med eigarar og sendt inn søknad til UDI. Fristen gjekk ut sist veke, fortel Ustad.

Erfaring frå 1990-talet

Odd Ustad fortel at selskapet Amdo AS har erfaring med mottaksdrift frå tidlegare.

– Det går heilt tilbake til 1998. Dette blir fjerde runden med mottak som me er involvert i, seier styreleiaren for det Tynset-baserte selskapet. Dei har ikkje vore involvert i mottaksdrift i Hallingdal før.

– Men det spelar liten rolle. Asylmottak blir stort sett drifta på same måte landet over, seier Odd Ustad. Dei forventar konkurranse i akkurat denne regionen:

– Det er mykje ledig kapasitet i Hallingdal og mange operatørar som er interesserte, fortel han.

Før UDI tek stilling til kvar dei vil opprette mottak blir det synfaring med både eigar av lokale og operatøren, i dette tilfellet Amdo AS.

– Kor mange mottak kan de drifte i vår region?

– Me har lagt opp til ein administrasjon og handtering av alle lokala me har søkt på. Om me får alle veit me ikkje enno, men me har kapasitet til å drifte alle. UDI set krav til bemanning på sju til ti tilsette per mottak, svarar Odd Ustad.

Unntak frå lova

UDI viser til at krigen i Ukraina held fram på uviss tid. På grunn av det høge talet på flyktningar som kjem til Norge har dei fleire prosessar gåande for å sikre innkvartering, skriv UDI i eit brev til kommunane.

Ei mellombels forskrift om unntak frå plan- og bygningslova skal gjere det meir effektivt å få innlosjert flyktningar. Det betyr at eigaren av lokala etter alt å døme ikkje treng å søkje om bruksendring for å etablere mottak.

– Slik me tolkar det, er ikkje dette søknadspliktig. I kraft av denne forskrifta skal dei kunne flytte rett inn, seier leiar for utbyggingsavdelinga i Gol kommune, Hanne Cecilie Nes. Viss UDI vel å tildele eit eller fleire mottak til desse hotella vil den aktuelle kommunen bli høyringspart i saka.

Torleif Kinneberg eig både Torpo Gjestegård og Hallingen høyfjellshotell, som er to av dei aktuelle bygga i Hallingdal.

– Eg sit meg eigedomane, og det ligg godt til rette for å kunne ta imot folk der, seier han og viser utover dette til selskapet Amdo AS som ønsker å leige bygga.

UDI vil ta stilling til kvar det blir tildelt nye flyktningmottak innan 22. juni.