Kommunen fortset å kjempe mot statsforvaltaren - vil la folk bu på hytta

Statsforvaltaren held fram med å klage på Gol kommune sine vedtak om å bu på hytta. Kommunen held fram med å avvise klagene.

Det siste året har kommunen fått fleire dispensasjonssøknader frå folk som ønsker å flytte på hytta. I fleire tilfelle har administrasjonen godkjent desse søknadene. Statsforvaltaren i Oslo og Viken meiner på si side at det er i strid med nasjonale føringar å la folk busetje seg på hytta.

Ei sak har alt gått vidare til settestatsforvaltar etter at Gol kommune stod fast ved vedtaket sitt. Denne er framleis ikkje avgjort. Tysdag avviste politikarane i Gol tre nye klager frå statsforvaltaren.

Ingen nye moment

I dei tre tilfella har kommunen godkjent søknaden om å flytte til hytta, men statsforvaltaren har klaga på vedtaka. Politikarane i Utval for natur og næring (UNN) vedtok samrøystes å ikkje ta desse tre klagene til følgje. Alle sakene vil difor gå vidare til ein settestatsforvaltar.

Politikarane kunne ikkje sjå at det hadde kome fram nye moment som gjorde at dei bør ta klagene frå statsforvaltaren til følgje.

Hadde gode grunnar

Det er ikkje fritt fram å flytte på hytta, og leiar i utbyggingsavdelinga Hanne Cecilie Nes understreka at straumstøtte aleine ikkje er god nok grunn til å få dispensasjon. Ein søkjar må oppfylle visse krav som til dømes at tilkomsten er vinterbrøyta og at dei endrar adresse i folkeregisteret.

I dei tre sakene som UNN behandla tysdag var det ifølgje politikarane oppgitt gode grunnar til å ta hytta i bruk som fast bustad. Det gjekk mellom anna på tilknyting til gardsbruk, avstand til eldre og pleietrengande foreldre og at det ikkje følgjer med barn i skulealder.

Statsforvaltaren argumenterer på si side med at det er langt til butikkar, ikkje gangveg og lite lagt til rette for barn og unge, for å nemne noko.

No blir sakene sendt til Kommunal- og distriktsdepartementet som vil utnemne ein settestatsforvaltar.