Oppe av isen etter sju timar

Mannskap gjennomførte sundag kveld ein imponerande bergingsoperasjon i Bergsjøtraktene i Ål.

Hallingdølen fekk seint sundag kveld tips frå eit augevitne i Ål om at ei tråkkemaskin tilhøyrande ei av turistbedriftene Vats hadde køyrt gjennom isen i Bergsjøon.

Ut frå biletet ser ein at det vart sett i gang ein omfattande operasjon for å berge maskina på land att, der også mange frivillige deltok. Ved 21.30-tida var ho på trygg grunn.

Det er etter måten mykje snø i fjellet, men det er også svært høg vasstand i både tjern og myrar. Løypemannskap åtvarar no skiløparar om at det er ein del overvatn ute i delar av løypenettet, og dei minner folk på at ferdselen skjer på eiget ansvar.

Det er også grunn til å vurdere om isen er tjukk nok til tung reiskap.