– Merkbart færre dyr
Nortura stadfestar at dei har færre dyr å slakte, men skuldar på det seine vårbeitet.
På medlemssidene til Nortura kan ein lese at det i år er eit stort underskot på lam i heile Norge. Den komande veka er det meld inn kring 30 prosent færre dyr, samanlikna med same veke i fjor.
«Dette er eit mykje større avvik enn vi hadde rekna med da vi laga tilførselsprognosar. Vi har nok underestimert verknaden av sein vår, seint beiteslepp og kanskje difor også seinare sanking», melder Nortura.
Artikkelen held fram under annonsen.
Helgefred på slakteriet
Slakteriet på Gol er no i starten av høgsesongen. 70 fast tilsette står klar med kvasse knivar. Og sist veke kom også 70 sesongarbeidarar som er klare til å gjere ein innsats ved slaktelina. Vanlegvis er det sundagsdrift på slakteriet midt i høgsesongen.
– Det var det ikkje grunnlag for denne helga, seier Ingrid Hillestad Medhus, fabrikksjef i Gol.
Håpar neste veke blir betre
– Er det nok arbeid til alle?
– Ja, det er det. Men me skulle gjerne hatt meir lam den komande veka. Samanlikna med i fjor, er det merkbart færre. Men me justerer planane og jenkar det til, og frå neste veke reknar me med at det kjem inn meir dyr. Innmeldingsfristen er enno ikkje ute. Det er først på tysdagane me veit korleis neste veke blir, seier Medhus. På medlemssidene skuldar Nortura på dårleg vårbeite og sein sanking.
– Me er klar over at ein del som har sau i fjella i Hallingdal har gått til konkurrentane i år, seier Medhus.