No er det like før dette huset er fjerna

I løpet av kort tid blir eit falleferdig hus jamna med jorda. Kommunen er i forhandlingar med entreprenør.

I svingen på nedsida av Rødberghallen og Rødberg skole ligg eit gamalt og falleferdig bustadhus som er i svært dårleg forfatning med ròte og hol i taket.

Falleferdig murhus

Huset har stått tomt i fleire år og vore til sjenanse og fare for heile området. Både naboar og Rødberg skole har ved fleire høve varsla kommunen om at det er farleg for uvedkomande å gå inn. Huset er for lengst stengt og låst.

Nore og Uvdal kommune har i lengre tid vore i forhandlingar med eigaren for å finne ei løysing. For eitt år sidan vart partane samde.

Utfallet vart at kommunen kjøpte det privateigde huset for å rive det. Bygningen er eit murhus, og rivekostnadene for huset og garasjen vart rekna til 200.000 kroner.

I juni i fjor løyvde kommunestyret denne summen til rivinga.

– Forhandlar med entreprenør

No er også formalitetane i orden. Kommunen godkjende i fjor haust rivesøknaden og miljøsaneringsrapporten for det falleferdige bustadhuset og garasjen. Vilkåret er at avfallet blir levert til godkjent mottak, og at tomta skal ryddast og pussast opp. Alle naboar er varsla, og ingen har kome med merknader.

Rivearbeidet har vore lyst ut, men det er førebels ikkje kjent kven som får tilbodet eller kva pristilbodet er.

– Tilbodsrunden er ikkje heilt ferdig. Me er i forhandlingar med entreprenør og håpar at rivinga kan koma i gang så fort som råd, seier prosjektleiar for bygg og anlegg i Nore og Uvdal kommune, Andreas Sveen.

– Er det prisen som er forhandlingstema?

– Eg kan ikkje uttala meg om det før forhandlingane er avslutta.

I reguleringsplanen er tomta regulert til bustadføremål.