Går inn for avliving av Nordfjella-reinen
Landbruks- og matminister Jon Georg Dale vil avlive villreinstamma i Nordfjella sone 1 for å overvinne skrantesjuka.
Avgjerda er i tråd med Mattilsynet si tilråding om å ta ut alle dei 2000 dyra innan 1. mai 2018.
Følgjer tilråding
– Ut ifrå dei eintydige faglege tilrådingane eg har fått frå Mattilsynet, Veterinærinstituttet og Vitskapskomiteen for mattryggleik (VKM), har eg gitt tilslutning til at det blir lagt opp til å ta ut villreinflokken i Nordfjella sone 1. Eg har bede Mattilsynet og Miljødirektoratet om fortløpande å gjera faglege vurderingar dersom nye prøveresultat eller andre tilhøve skulle tilseie endring av tiltaka, seier Dale i ei pressemelding.
Artikkelen held fram under annonsen.
Føresetnadar for uttak
Innan 15. juni skal Mattilsynet, Miljødirektoratet og andre relevante instansar utarbeide ein konkret plan for uttak av Nordfjellaflokken i sone 1, innan 1. mai 2018. Planen skal beskrive den praktiske gjennomføringa av uttaket, framdriftsplan, opplegg for prøveuttak, kjøt- og avfallshandtering og relevante smitteførebyggjande tiltak.
Ein av føresetnadane for uttaket er at tiltak må innrettast slik at saneringsperioden vert så kort som mogleg. Gjennomføringa må vareta omsyn til dyrevelferd og mellom anna ta høgde for at uttak av høgdrektige dyr bør unngåast. Ein konkret plan for gjenoppbygging av villreinstamma i Nordfjella må på plass så fort som mogleg. God involvering av grunneigarar, beitebrukarar og berørte kommunar vert også trekte fram som eit viktig punkt.
