To vassdrag vart til eitt
Stolsvassutbygginga og Stolsvassmagasinet omfattar to vassdrag.
Det eine er Votna som renn frå høgfjellet og ned igjennom Vats, Leveld og Votndalen. Det andre er Urunda som renn mot det øystre dalføret i Hol og kjem ned i dalen vest for Hovet sentrum.
Artikkelen held fram under annonsen.
Dei austlege vatna i magasinet, Buvatn, Mjåvatn/Frosen og Rødungen hadde opprinneleg utløp til Votna. Den vestlege delen av magasinet med Iungsdalsvatnet, Djupsvatnet Stolsvatnet og fleire mindre vatn hadde avløp til Urunda som renn til Hovet.
I alt omfattar magasinet 14 små og store vatn. Fleire kanalar knyter dei saman. Det meste av vatnet vert no tappa frå Stolsvassmagasinet austover, gjennom Mjåvatn, ut i Rødungen og vidare sørover i tunnel til Varaldsetvatn der det går i ny tunnel til kraftstasjonen i Ruud.
Det hender og at det blir tappa vatn frå Stolsvassdammen til Urunda. Etter nokre kilometer blir vatnet då teke inn i tunnel att, ved Greinefoss, og ført til «lagring» i Strandavatn. Ny tunnel frå Stolsvatn til Ruud vil venteleg redusere behovet for denne lagringa. Flyttinga av vatn til Strandavatn og seinare attende til kraftproduksjonen i Ruud fører dessutan med seg tap av energi.
