Sjukeheim og skule råka av smitte: 14 elevar testa positivt i helga
Elevar i seks skuleklassar ved ungdomsskulen i Ål har fått bekrefta koronasmitte.
– Det er eit utbrot som dukka opp i helga. Her har me 14 smittetilfelle fordelt på seks klassar. Det vil seie heile 8. og 9. trinn, seier kommuneoverlege Toril Bøyum.
Det er inga endring i drifta ved skulen av den grunn, men elevane vil bli følgt opp med regelmessig testing i tida framover.
Artikkelen held fram under annonsen.
– Me ventar at det vil kome fleire positive svar, det er nok ulike smittevegar her, seier Bøyum.
– Men det er også venta at det er slik me må leve med smitta framover.
Også sjukeheimen er råka av smitte.
– Ein tilsett har fått bekrefta smitte, men har ikkje nokon definerte nærkontaktar på sjukeheimen, seier Bøyum.
– Me har likevel vald å følgje opp med testing på ei mindre avdeling.
– Er det travle dagar for dykk?
– Det er det. Me har også hatt mange inne på ekstra testing i helga.
Det er 54 personar som er smitta av koronaviruset i Ål akkurat no. 36 av desse kom via hurtigtestar i helga.
Artikkelen held fram under annonsen.