Ras på Rv7 mellom Hardangerbrua og Eidfjord – vegen er stengd
Riksveg 7 Eidfjordvegen er stengd mellom Hardangerbrua og Eidfjord etter at det har gått eit steinras ved Fosså.
Ein geolog er på veg til staden, opplyser Vegtrafikksentralen vest.
– Det har kome ned ein stein på éin kubikk og masse og tre i vegbanen. Entreprenør er på staden, ingen er skadd, seier trafikkoperatør Kjetil Hodnekvam hos Vegtrafikksentralen til Bergens Tidende.
Artikkelen held fram under annonsen.
Klokka 15 kjem det ei ny oppdatering om vegen skal opnast.
Det er inga omkøyringsmoglegheit inn og ut av Eidfjord mot Hardangerbrua/Odda, opplyser Vest politidistrikt.
Vegstrekninga er ei av hovudfartsårene mellom Oslo og Bergen. (©NPK)
