To nye smitta i Gol - er oppe i sju tilfelle på fem dagar
Kommunen har fått kontroll på smittesituasjonen, men fekk laurdag to nye positive prøvesvar.
Det fortel ordførar Heidi Granli til Hallingdølen laurdag kveld.
– Begge er nærkontaktar, så det var såleis venta, seier ho.
Artikkelen held fram under annonsen.
I løpet av den siste veka har omtrent ti prosent av befolkninga i Gol sete i ein eller anna form for karantene.
Svært mange sleppte ut att i løpet av torsdag og fredag, mellom anna ein del elevar ved Gol skule og på vidaregåande.
Smittetilfella som kom laurdag får ingen ytterlegare konsekvensar.
– Dei utløyser ikkje behov for nye karantenar eller meir sporing, seier Granli.
Tilfella er dei sjette og sjuande sidan tysdag i Gol. Då gjekk alarmen i kommunen, etter at to personar vart bekrefta smitta. Det var ei stund ein spennande situasjon, før kommunen fann ut av smittevegen og fekk testa moglege nærkontaktar. Men i løpet av torsdag og fredag var biletet blitt såpass klart at kriseleiinga kunne seie dei har kontroll.