Luftig hallingkast kåra til årets bilete i Buskerud: – Eit bra actionbilete
Anna Huseby i Hallingdølen fekk fredag kveld Fotoprisen til Buskerud Journalistlag.
Utdelinga skjedde på Norsk Journalistlag Buskeruds prisfest på Pigen i Drammen, der rundt 40 journalistar frå Buskerud deltok.
Hallingdølen markerte seg på fotosida i årets konkurranse.
Artikkelen held fram under annonsen.
Anna Huseby tok den gjævaste Fotoprisen med eit blinkskot frå fjorårets Folkemusikkveke i Ål. Biletet syner Vilde Westeng i det ho gjer eit realt kast i hallingdanstevlinga framfor Sundrehall i mai 2022. Westeng var forresten den første kvinna til å vinne ein hallingklasse på Landskappleiken i 2019.
– Eit bra actionbilete, uttaler juryen som består av Tor Lindseth, Werner Juvik og Jørn Grønlund.
I ein underkategori innan foto, beste sportsbilete, gjekk Elias Dahlen i Hallingdølen til topps med bilete av fotballkeeper Johnas Ulshagen Jorde i serien Idrettsdraumen. Ragnar Hilde, Hallingdølen vann to underkategoriar: Beste nyheitsbilete der han fanga situasjonen då ein ung sjåfør mista bilen sin som gjekk opp i røyk, og Beste portrett med bilete av 100 år gamle Kåre Bergo.
Journalistprisen i Buskerud 2022 gjekk til Jenny Ulstein i Laagendalsposten og Arild R. Hansen i Drammens Tidende for deira artiklar om Espen Andersen Bråthen, etter at han drap fem personar i Kongsberg 13. oktober 2021. I artiklane stilte dei spørsmålet: «Burde drapsmannen ha vært stoppet tidligere?».
I klassen Årets snakkis gjekk prisen til Harald Reitan som i ein større artikkel i Hallingdølen synte korleis hallingmålet er på kraftig retur blant unge i Hallingdal.
Elles vart desse prisane delt ut:
Årets featuresak: Camilla Øvrebø Ondqrckova, Drammens Tidende for «Sammen til siste slutt - historien om Liv og Thor, som delte livet - og døden».
Godt språk-prisen: Tuva Skei Tønset, NRK for «Misbrukt av treneren».
Artikkelen held fram under annonsen.
Open klasse: Linn Kristin Djønne, Laagendalsposten for «Pappaen min».
Årets talent: Ninni Bjørlo Lærum og Joakim Vilan, sommarvikarar i Drammens Tidende.
Heidersprisen vart i år tildelt Lars Johnsen i Drammens Tidende.