Kraftig mildvêr gir betydeleg skredfare i Hallingdal
Måndag vart skredfaren oppjustert til nivå tre - betydeleg skredfare.
– Det er aukande skredfare i heil hallingdalsområdet, fortel vaktleiar i skredvarslingstenesta, Emma Julseth Barfod.
Mildvêr og regn
Fram til måndag var skredfaren på nivå to. Måndag vart faren justert opp på grunn av vêrforholda.
Artikkelen held fram under annonsen.
– Det kraftige mildvêret fører til svekt snødekke. Då kan det lett gå naturleg utløyste skred, fortel Barfod.
Det vil seie at det kan gå skred utan at personar er i området som løyser det ut.
Lengst vest er det også meldt ein del regn, som også gjer forholda meir ustabile.
Heile området
– Hallingdal strekkjer seg frå Hardangervidda til Gulsvik. Er skredfaren like stor i heile området?
– Ja, det er meldt temperaturstigning i heile området. Det er meldt mest regn i vest, men skredfaren er aukande i heile regionen.
30 grader
Skal ein ferdast i fjellet må ein med andre ord passe seg ekstra godt for rasutsette område.
– Når forholda er slik dei er no, vil eg oppfordre folk til å unngå skredterreng. Det vil seie område brattare enn 30 grader. I tillegg er det lurt å halde god avstand til bratte sider fordi snøskred kan gå temmeleg langt, seier Emma Julseth Barfod som fortel at Varsom har ein eigen app folk kan bruke for å få best mogeleg oversikt kvar skredfaren er størst.
Blir kaldare
Utover i veka er det meldt kaldare vêr. Det betyr meir stabile snøforhold. Men dei fyrste dagane er skredfaren betydeleg, ifølgje varsom.no.
Artikkelen held fram under annonsen.