Hemsedal tredje beste kommune i Buskerud
Forbrukarrådet har kåra Rollag til beste kommunen i Buskerud. Hemsedal er best av hallingdalskommunane.
Forbrukarrådet har testa kor flinke kommunane er til å hjelpe folk som har spørsmål om kommunale tenester. Alle landets kommunar har vore med i undersøkinga. Forbrukarrådet har henta inn over 30.000 opplysningar via telefon, e-post og nettsider. Best i landet er Nesset kommune i Møre og Romsdal føre Bergen og Nannestad.
Hemsedal er best av kommunane i vår region. Deretter fylgjer Nore og Uvdal, Gol, Nes, Ål, Hol og til sist Flå. Fylkesvinnaren Rollag vart også kåra til beste kommunen i Buskerud i 2013.
Artikkelen held fram under annonsen.
Inger Lise Blyverket som er direktør i Forbrukarrådet er imponert over Nesset kommune.
– Nesset kommune forstår kor viktig det er å snakke med innbyggarane. Vidare er kommunen flink til å gje raske og gode svar. Nesset kommune tek på alvor at kommunane har tenester som er viktige i liva våre.
Årets vinnarkommune har omkring tre tusen innbyggarar, medan sølvvinnaren har nesten 300 000. Forbrukarrådets kommunetest viser at store kommunar generelt får best resultat, men fleire små kommunar hevdar seg også godt.
– Me kan difor konkludere med at det er mogeleg for alle å gjera det bra – både David og Goliat, understrekar Blyverket som også har ei oppmoding til kommunane.
– Kommunane må gjere innbyggarane til hovudpersonane. Difor må dei spørje innbyggarane kva dei synest om tenestene, ta svara på alvor og vere opne om svara.
