Første smittetilfelle på over ei veke: – Varsko til alle om å vere var på symptom

Ein person er smitta av koronaviruset i Hemsedal etter å ha hatt påskebesøk.

– Det er ikkje mange som er sett i karantene som følgje av dette. Berre tre, pluss åtte i ventekarantene, fortel kommuneoverlege Camilla Underland til Hallingdølen måndag kveld.

Den smitta er fastbuande, og fekk symptom på tampen av påska. Personen vart testa med hurtigtest måndag, og svaret kom att positivt.

– Smittevegen er frå utanfor dalen. Vedkommande har hatt besøk av nokon som truleg er smittekjelda. Me har full kontroll på dette, men det er likevel eit varsko til alle om å vere var på symptom. Om du har vore på reise eller hatt besøk, og får symptom, må du teste deg, seier Underland.

Vil bli meir testing

Smittetalet i Norge har gått ned i påska, men samstundes har færre testa seg. Det er dei neste dagane og vekene som vil kunne si noko om korleis påska har gått.

– Me er naive om me trur me ikkje har hatt smitte innom den siste veka, seier Underland.

Truleg vil testaktiviteten gå opp dei kommande dagane, også i store kommunar. Når mykje folk har vore på farten, er det truleg at det vil dukke opp smitte her og der.

Kryssar fingrane

Ved inngangen til påska opplevde Hemsedal å få beskjed om ei sosial samling i bygda som hadde endt med ti smitta. Ingen av dei høyrde heime i Hemsedal, og kommunen fekk ikkje beskjed frå dei råka kommunane om det hadde skjedd noko.

Dette ønsker ikkje Underland å oppleve på ny.

– Når det blir stor aktivitet med sporing og testing i store kommunar er me urolege for at me ikkje skal få beskjed, seier ho.