Finalekampen gjekk først klokka 05.00 - sjå stor fotoserie frå nattcupen: – Me er superglade for at idrettslina ikkje vart lagt ned

Omlag 140 spelarar med stort og smått konkurrerte i Nattcupen i Gol fredag. Eller rettare sagt - frå fredag til grytidleg laurdag morgon.

Gjennom heile natta vart det arrangert kampar i Gol samfunnshus. Nattcupen er populær og har kring 140 spelarar frå 15-22 år.

– Men og femtiåringar. Me har lærarlag også, smiler gutane Adam M. Martinsen og Simen Skogholt, som er avgangselevar på Idrettslina.

Det er dei 22 avgangselevane som arrangerer Nattcupen. I tillegg må kvar elev ha med seg ein vaksen. Så dei er mannsterke.

– Dette er ein del av faget til elevane på idrettslina. Dei arrangerer nattcup, og to volleyballcupar, fortel lærar på lina, Trude Andersen Børtnes.

28 fargerike lag

– Me har 28 lag, fortel Martinsen og Skogholt. Dei sit innanfor døra og instruerer spelarar og lag som kjem fargerike forbi. Politi, cowboyar, Foodora og Trump-capsar. Hårete leggvarmarar i knallrosa og glitter og stas susar forbi. Til og med pølse i brød.

– Er det påbode med utkledning?

– Nei, men det er vorte tradisjon å kle seg ut etter lagnamna, smiler Martinsen.

På slutten av cupen blir beste lag med beste kostyme kåra.

– Klokka 22.15 har me show-kamp der spelarane har straum-band kring leggen. Publikum sender inn namn på kven dei tykkjer skal få støyt, fortel Martinsen.

141 tilskodarar er allereie klokka 20 registrert via qr-koden, der dei betaler inn på vipps. I løpet av nattcupen var 300 publikum innom, i tillegg til alle som spelte.

– Me samlar inn pengar til treningstur, så me er avhengige av publikum, smiler gutane. Adam leier an opp trappa forbi frynsete vestar og cowboyhattar.

– Me har jobba hardt for at idrettslina skal bestå. Dette er berre noko av det me driv med, fortel Martinsen.

Grytidleg finalekamp

Det er enno tidleg på kvelden, og finalekampen er laaaangt unna førebels.

Den går nemleg ikkje før klokka 05.00. Grytidleg laurdag morgon.

Finalekampen har aldri tidlegare vore så sein.

– Me brukar å gå heim klokka 05, smiler lærar Børtnes.

Fyrste kampen starta klokka 17, så går det slag i slag med ny 8-minutts-kamp kvart tiande minutt.

På nattcup kan ein stille med herrelag, damelag eller mixed-lag. Eit lag har fem spelarar på banen samtidig, og må bestå av minimum seks spelarar for å vere med.

Eit reint damelag startar med tre mål i pluss. Mixed-lag startar med eit mål i pluss.

Næringslivet stiller opp og sponsar med mange flotte gevinstar. Vinnarane får vandrepokalen frå HFK.

Ekstraaktivitetar

I tillegg til spennande kampar med spelarar i gøyale kostyme, som «pølse i brød»-kostyme som strever litt med å springe, er det og høve til andre aktivitetar under nattcupen.

Skyting på blink og minifotball går føre seg ute i korridoren.

Her finn me Ingrid Situ, Elise Nibstad og Bjørg Venås. Dei skal spele om eit kvarter og er veldig gira.

– Me er glade for at idrettslina ikkje vart lagt ned, strålar dei medan Synnøve Bekkestad tilsynelatande knuser Kristian Intelhus i minifotball.

Emily Bryplass glitrar oppe blant tilskodarane. Ho går fyrste året på idrett og kan knapt vente til dei skal arrangere nattcup.

– Dei i tredjeklasse er skikkelege inspiratorar for oss. Me er superglade for at lina ikkje vart lagt ned. No kan me glede oss til å arrangere dette sjølv, glitrar ho.

Zoom Førre Neste