Fem nye er smitta: Fleire skuleklassar i karantene

Gol har fått 14 smittetilfelle sidan laurdag. Det får konsekvensar.

Dei siste fem positive prøvesvara kom kommuneoverlege Jagannivasan Thurainayagam i hende torsdag kveld. Tre av desse var alt i karantene, sidan dei var nærkontaktar til personar som alt var smitta.

Dei to andre hadde ikkje samanheng med smittetilfella som Gol har hatt dei siste dagane.

– Den eine har ein kjent smitteveg utanfrå kommunen. Men den andre har ein ukjent smitteveg, seier Thurainayagam.

Les også
Fem nye koronasmitta: – Spent på testane framover

Han fortel at dei nye smittetilfella gjer at ein klasse ved Gol barneskule og ein klasse ved Gol vidaregåande no er sett i karantene.

– Me er i gang med å planlegge testar for begge desse klassane. Det vil skje i løpet av dei neste dagane. Alle som skal testast vil bli kontakta. Det er karantene for desse fram til dei får eit negativt prøvesvar, seier Thurainaygam.

– Leitar de etter smittekjelda for det tilfellet som har ukjent smitteveg?

– Me prøver å nøste så langt me kan, men i nokre tilfelle kan det bli vanskeleg. Spesielt no som det er mykje smitte nasjonalt. Då blir fokuset vårt å kjempe mot smitteutbrotet, seier Thurainayagam.

Les også
Smitta i Nesbyen: Den store konfirmasjonshelga kan ryke
Les også
Ungdomsskulen sett i karantene etter smitte
Les også
Dei første testane var negative - ventar i spenning på fleire prøvesvar