Driv med dataspel i skuletida
Elevar i Hemsedal får drive med dataspel i timen. Anders Lirhus, Eirik Skølt og Olaf Zbierzchowski har til og med vunne pris på det.
Heime går det mest i Team Fortress II for Olaf Zbierzchowski. Anders Lirhus er for tida mest ivrig på Dark Souls II. Eirik Skølt held ein knapp på Rome II.
På skulen går det i spelprogrammering. Deira første produksjon har dei kalla «KoduVenture». Spelet har dei alt vunne pris for. Tidleg i mai henta dei heim pokalen som beste KoduBuilder, som ein av fire prisutdelingar.
Artikkelen held fram under annonsen.
Teknologi i praksis
Teknologi i praksis er eit valfag berre enkelte skular tilbyr. I Hallingdal er det berre Hemsedal og Ål som tilbyr faget i år, og berre i Hemsedal faget også inkluderer spelprogrammering.
– Eg syntest dette verka mest spennande, seier Anders Lirhus om valet av årets valfag. Mens han og kameratane tidlegare berre hadde spelt, har dei no fått eit innblikk i kva som gjer at spela fungerer som dei gjer.
– Målet er å auke interessa for realfag, seier Eva Marianne Bodin, lærar og IKT-ansvarleg ved Hemsedal barne- og ungdomsskule.
«Lær kidsa koding»
Læraren er tilhengar av at dei unge også må lære seg «språket» for teknologien. Eit Microsoft-basert spelprogrammeringsprogram ved namn Kodu er ein grei inngang.
«Lær kidsa koding», seier ho og stadig fleire som no utgjer eit nasjonalt nettverk av datakunnige IKT-misjonærar. Det er med koding framtida skal byggast.
– Kva har de eigentleg lært?
– At koding tek tid, så ein må vere tolmodig, seier Eirik Skølt.
I gang med spel nummer to
Om det blir jobb i spelindustrien, til dømes hos Sega, Playstation eller Xbox, eller om det blir realistar Norge kan bruke i eigen industribygging vil berre framtida vise.
Artikkelen held fram under annonsen.
– Me ville gjort meir ut av det, men programmet har visse avgrensingar. Ein må ha meir tid og eit kraftigare program for å få til alt ein vil, seier Olaf Zbierzchowski. Han både viser og forklarar korleis dei har gått fram.
– Neste steg blir å programmering i Java, legg han til. Dei tre er alt i gang med sitt andre spel. Om eit år vil dei konkurrere heilt i toppen av datacupen.
– Men eg for min del er sikker på at eg ikkje kjem til å jobbe med programmering, seier Lirhus. Det er jo ei avklaring det også.
Målet er å auke interessa for realfag.
Eva Marianne Bodin
Sjå video
* Nokre skular tilbyr teknologi i praksis som valfag.
* I Hallingdal gjeld dette Hemsedal og Ål. Berre Hemsedal tilbyr spelprogrammering.
* Microsoft sin Kodu Game Lab tilbyr eit dataprogram som gjer det mogeleg for barn og unge å lære programmering.
*Tre elevar frå Hemsedal melde seg på årets Kodu-cup, der dei også vann pris.
* «Lær kidsa koding» er eit nettverk for folk som ønskjer å lære barn IT.
