Det var høg testaktivitet på Geilo denne veka. Foto: Ragnar Hilde

296 smitta i Hallingdal denne veka: Sjekk status for din kommune

Både Hol og Gol står i ein situasjon der smitta har auka stort på kort tid. Men stort sett har kommunane god kontroll.

Hol har sidan måndag fått 109 bekrefta smitta. Tidlegare denne veka fortalde kommuneoverlege Silje Koldal om ein svært krevjande situasjon.

– Me har alle ressursane våre i sving, og me omrokkerer slik at me greier å teste alle som treng det. Det er svært krevjande arbeidsforhold no, og strikken er tøygd så langt me klarer, sa ho.

Les også
Enorm auke i smitte: – Me er bekymra for den brå stigninga

Fredag fortel ho at smitta held fram å auke, men:

– Me må ha tid til å stole på systema med testing, og samle informasjon derifrå. Me held fram med gult nivå i skule og barnehage.

– Sjølv om det er høge smittetal i Hol, slik det også er i andre kommunar, har eg tillit til at testing og inndeling i kohortar skal hjelpe oss med å avgrense omfanget av dette, seier Koldal.

Det er omikron som dominerer. Den gir ikkje så alvorleg sjukdom, men nokon blir likevel hardare råka enn andre.

Artikkelen held fram under annonsen.

– Me har lagt inn to personar denne veka. Dette er personar med risikofaktorar, fortel ho.

Smittesituasjonen i Hallingdal per 14. januar
KommuneTal på smitta
Flå5
Nesbyen9
Gol81
Hemsedal51
Ål41
Hol109

Kraftig utvikling

Også i Gol har smittekurva gått bratt til himmels denne veka. På fem dagar har 81 personar blitt smitta, og kommuneoverlegen ventar dei vil passere 100 i løpet av veka.

– Om me alle kan avgrense talet på nærkontaktar dei neste par vekene, vil det hjelpe oss i arbeidet. Då vil me kome raskare attende til normalen, seier kommuneoverlege Jagannivasan Thurainayagam.

Også Gol har valt å halde skular og barnehagar på gult nivå.

Har fått kontroll

Hemsedal har hatt ein svært krevjande situasjon i starten av januar, men no melder kommuneoverlege Camilla Underland om god kontroll. 51 personar har fått bekrefta koronasmitte denne veka. 183 har blitt testa.

– Me har god kontroll og oversikt, seier Underland. Smitta er i hovudsak knytt til skule, barnehage og tilreisande.

Artikkelen held fram under annonsen.

Ål har 41 smitta den siste veka. Nesbyen melder om ni tilfelle, Flå om fem.

Les også
Nye reglar for karantene og skjenkestopp klokka 23: Her er dei nye tiltaka
Les også
200 ungdommar med i krasj mellom bussar og trailerar
Les også
Video: Her ser du bussane krasje i trailerane