Legekontor over heile landet testar personar for korona. Fredag hadde talet på smitta nordmenn passert 100. I Hallingdal er førebels ingen smitta.

20 negative koronaprøver i Hallingdal

Ingen hallingar har testa positivt for koronaviruset. Men trykket mot helsetenestene er høgt.

Spørsmåla er mange om virussjukdommen som spreier seg dag for dag.

— Det er ekstremt mange førespurnader. Me blir nedringt, seier kommuneoverlege i Ål og Hol, Geir Strømmen.

Artikkelen held fram under annonsen.

Flest i Hemsedal og Hol

Fredag føremiddag passerte talet på smitta personar i Norge 100. I verda nærmar talet seg 100.000. I Hallingdal er det førebels berre negative prøvesvar. Tal Hallingdølen har fått, viser at det fredag føremiddag var 20 negative prøver.

— Det er ingen positive prøveresultat, seier Strømmen.

To kommunar skil seg ut med flest prøver.

— Det er overrepresentasjon av prøvetaking i Hemsedal og Hol, seier Strømmen.

Koronaviruset

* Ifølgje Folkehelseinstituttet (FHI) har feber vore rapportert som eit vanleg symptom på infeksjon. Sår hals er rapportert hjå personar med mild sjukdom, og litt sjeldnare er det vorte rapportert om lungebetennelse med pustevanskar og/eller hoste.

* Viruset kan smitte gjennom lufta, direkte kontakt og gjenstandar.

* FHI rår til god handhygiene, både hjå sjuke og friske. Dette er viktig for å hindre smitteoverføring. Vask hendene ofte og grundig med såpe og lunka vatn, spesielt når ein har vore ute blant folk. Spritvask er eit godt alternativ dersom handvask ikkje er mogleg.

31 i karantene

Det er også i dei to største turistkommunane flest er i karantene. Totalt i Hallingdal har 31 personar vore eller er i karantene. Dei er i karantene fordi dei har hatt kontakt med folk som mogleg er smitta.

— Føler hallingane råda om å ringe hjelpetelefonane i staden for å møte opp på legekontora?

— Ja, det verkar som det går veldig bra. Råda blir følgd.

Artikkelen held fram under annonsen.

Smittevern

* Hallingdalskommunane følger råda frå Folkehelseinstituttet, og alle helsearbeidarar er oppdaterte på korleis dei skal halde seg til viruset.

* Personar med sår hals, feber, forkjølingssymptom, hovudpine eller pustevanskar, skal ta kontakt med legevakt. Du skal ikkje møte opp på legekontoret.

* Folk med spørsmål om koronaviruset, skal ringe publikumstelefonen på 815 55 015.