Bli med bak kulissane då NRK sende direkte frå Hallingdølen

– Dette vart kjempefint, no må eg nesten begynne å abonnere på Hallingdølen. Programleiar Charlotte Haarvik Sanden og «Norge Nå»-redaksjonen sende tysdag direkte frå avishuset i Hallingdal.

– Har alle køyreplanen? Me startar med Charlotte i gangen og så går me over til altanen. Produsent Lars Chr. Wallace har samla alle 13 i NRK-crewet ein times tid før sending. Dei skal sende direkte i ein halv time, frå Hallingdølens lokale i Ål. Heile sendinga er sett av til norske lokalaviser i kveld. «Hallingdølen har fleire gonger blitt kåra til Årets lokalavis. Kva er hemmelegheita bak suksessen og kor viktig er eigentleg lokalavisene?», heiter det i programomtalen.

SJÅ SENDINGA HER.

Stoltheit

Snart skal sendinga begynne og redaktør Embrik Luksengard og vaktsjef Bjarne Tormodsgard trippar spent i gangane. Med i sendinga skal også styreleiar i Landslaget for Lokalaviser (LLA), Tomas Bruvik, vera. I tillegg til sjølvaste «badesken», Ken André Ottesen, som gjer det stort med instagram-kontoen der han lagar moro av norske lokalaviser. Mens nokre grin på nasen om dei hamnar på sida hans, tek dei aller fleste lokalavisjournalistar det som eit stort kompliment.

– Det er veldig stas for folk å koma i lokalavisa. Og dei smiler på biletet, uansett kva saka handlar om. Det skal heller ingenting til for å koma i lokalavisa, og det er veldig fint, slår Ottesen fast. Sjølv jobbar han på desken til VG og konstaterer at her er det ytst få som får plass i spaltene, som oftast må dei vera veldig rike eller verdsmeistrar i noko.

– Dei fleste av oss er ikkje i nærleiken av det, og det er heldigvis inga grense for kva som skal til for å hamne i lokalavisa, seier «badesken». LLA-leiaren er samd:

– Badesken er heilt fantastisk og er med på å skape stoltheit i lokalavisene.

Krevjande å nå dei unge

Tomas Bruvik får god tid til å prate om kvifor norske lokalaviser er så viktige.

– Me er dei einaste som skriv om det som skjer i lokalsamfunna, om folk, nyheiter og sterke historier, seier Bruvik. Han vedgår at snittalderen for avislesarar er høg, rundt 60 år på papir og 50 år på nett.

– Me må jobbe for å få dei unge med oss, ved å skrive om dei og vera viktig for dei, meiner Bruvik.

Embrik Luksengard og Bjarne Tormodsgard får fortelje om Hallingdølen og kor viktig det er at avisa skapar engasjement og debatt.

– Avisa er ein fellesarena for folk i Hallingdal, for nyheitsformidling og debatt, og er viktig for å bygge identitet i regionen, seier Luksengard. At avisa klarar å skape engasjement og debatt er bra, meiner Luksengard og Tormodsgard. At det kan gå ei kule varmt etter ein leiarartikkel er ikkje noko problem, seier dei to.

– Så lenge du har belegg for det du skriv, og behandlar folk med respekt, går det bra, seier Tormodsgard.

– Over all forventing

– Kva mistar me om Hallingdølen forsvinn?, spør programleiaren.

– Då mistar me ein felles møteplass og grunnlaget for å engasjere seg i lokalsamfunnet. Avisa er viktig for å bygge opp identiteten til regionen, og me formidlar historiene til folk flest, seier Luksengard.

– Om Hallingdølen forsvinn vil Hallingdal som region smuldre, slår Tormodsgard fast.

Etter sendinga er både intervjuobjekt og NRK-gjengen fornøgde med resultatet.

– Dette vart veldig fint, seier programleiar Charlotte Haarvik Sanden: – Redaktørane var strålande. Ken André var morosam og eg lo sikkert alt for høgt, og Tomas sette det heile i perspektiv. I reportasjane var det også fine folk med, så sendinga gjekk over all forventning, oppsummerer Sanden.

NRK-teamet held seg i Hallingdal. Onsdag sender dei frå ostebygda Hol og torsdag er Skarverennet tema. Dette er den siste veka med «Norge Nå» før sommaren.