annonse

– Alle dei fine folka kjem heim til jul

Musikkmøte
Musikkmøte: Den årlege julekonserten har blitt ein årleg møteplass for musikarar frå Hol. Her er Gard Songstad Hella solist på «Have yourself a merry little Christmas». I bandet spelar Sunniva Fossly (f.v.), Ramona Fossly og Kaja Sandsmark. (Foto: Tor Folgerø)
Hane i flokken
Hane i flokken: I samspel med band og åtte kordamer var Erlend Ranestad Eggen (i midten) solist på «Come thou fount of every blessing». (Foto: Tor Folgerø)
Ungt talent
Ungt talent: Tuva Schøyen Grue (16) var blant dei yngste på scenen under konserten «Julestemning under Skarvet». Her som solist på «I’ll be home for Christmas «. (Foto: Tor Folgerø)
Julestemning
Julestemning: Julekonserten er viktig for musikarane, men det har også blitt ein viktig juletradisjon for publikum. Laurdag var det knapt eit ledig sete å oppdrive. (Foto: Tor Folgerø)
Veteran
Veteran: Erlend Ranestad Eggen hugsar ikkje kva år han debuterte som solist på julekonserten. – Men eg er nok ein av dei som har vore med lengst, seier han. (Foto: Tor Folgerø)
Tre søstrer
Tre søstrer: Vanja Fossly var solist på «Barnet i krybben» med støtte frå systrene Sunniva (t.v.) og Ramona. (Foto: Tor Folgerø)
Stemningsfullt
Stemningsfullt: I meir enn ti år har holingane gått jula i møte med glitterstøv på jakkeslaga og søt julemusikk i øyro. Her er det Solfrid Nestegard Gjeldokk (i midten) som er solist på «God rest ye merry gentlemen». (Foto: Tor Folgerø)
Heim til jul
Heim til jul: Petronella Ibsen Børnick er ei av fleire utflytte geilingar som har gjort det til ein tradisjon å synge inn jula med «Julestemning under Skarvet. Her som solist på «God jul igjen». (Foto: Tor Folgerø)
Stemmeprakt
Stemmeprakt: Tina Tuft Skogheim var solist på «Desember». (Foto: Tor Folgerø)

Det siste tiåret har holingane gått inn i julehøgtida med søt julemusikk i øyro og glitterstøv på netthinna.

Tor Folgerø

Konserten «Julestemning under Skarvet» har blitt ein tradisjon som samlar songarar, musikarar, og eit stort publikum i Geilo samfunnshus siste laurdag før jul.

Slepte av seg eit gledessukk

Om det er tiande eller ellevte året, er det ingen som er heilt sikre på. Sunniva Fossly (26) er ei av dei som har kome ut av teljinga på kor mange år ho har vore med. Laurdag var ho ei av kring 15 solistar som stod på scenen. Før gav mikrofonen til neste solist, måtte ho sleppe av seg eit gledessukk:

– Det er så god å møte att dei fine folka som kjem heim til jul, sa ho.

Årleg oppdatering

– Kva betyr konserten for deg?

– For meg er det noko med at me møter dei same folka år etter år. Me kunne sjølvsagt sett oss på ein kafe og prata, men eg synest det er ekstra flott at me skaper noko i lag. Me har berre fredag og laurdag på å øve inn programmet. Det er ulike band på ulike låtar, og mens nokre er opptekne av å øve, er det andre som har tid til å prate, bli oppdatert på skulegang, jobb og graviditetar, seier ho.

Møteplass

Fossly jobbar som turnuslege i Volda. Ho var ei av mange som «kom heim». Erlend Ranestad Eggen (36) er på si side bufast på Geilo. Men også han synest det er stas når folk kjem heim. – Det er ikkje farleg at folk reiser ut for å studere så lenge dei tek med seg musikaliteten heim att på juleferie, seier han.

– Konserten har endra seg med åra. Det eine er at kvaliteten har blitt betre, år for år. Det andre er at konserten har blitt ein tradisjon for heile bygda, ikkje berre for oss som står på scenen. Også for publikum har dette blitt ein møteplass for å treffe kjentfolk, seier han.





annonse