Bøkko er redd OL blir øydelagt utan Mueller

- Det er uaktuelt at Hans Trygve Kristiansen blir trenaren min, seier skøyteløpar Håvard Bøkko. Han utelukkar ikkje at Mueller kan bli hans personlege trenar.

Håvard Bøkko (22) er usikker og lei. Han veit ikkje kva han skal gjera når han no mistar trenaren sin gjennom seks år midt i OL-sesongen.

– Kristiansen uaktuell for Bøkko

Bråket i skøyteleiren enda måndag ettermiddag med at Peter Mueller fekk sparken. Skøytestyret var samla heile dagen i går for å finne ut korleis ein skulle løyse tumultane etter den påståtte trakasseringa av Maren Haugli.

Konklusjonen var klar: Peter Mueller blir løyst frå kontrakten.

– Eg har ikkje bestemt meg for kva eg skal gjera. Det einaste som er sikkert er at Hans Trygve Kristiansen ikkje blir trenaren min. Treningsprinsippa hans kjem 20 år for seint, seier Håvard Bøkko.

Ingen i nærleiken av Mueller

Det er snart seks år sidan Peter Mueller oppdaga stortalentet frå Hovet då dei møttest under ei landslagssamling på Gol. Det var «kjærleik ved fyrste blikk».

Mueller har hovudæra for at Håvard Bøkko har vore verdas nest beste skøyteløpar dei tre siste åra. Han er også Norges einaste medaljehåp på OL-isen. No har samarbeidet rakna på verst tenkelege tidspunkt.

– Er det aktuelt å engasjere Mueller som personleg trenar ut sesongen?

– Sportsleg ville det vera beste løysinga. For det finst ingen som er i nærleiken av å vera like god trenar som Peter. Men det kan oppstå praktiske problem i forhold til resten av laget og forbundet.

For mykje støy rundt trenare

– Vil eit trenarskifte øydeleggje medaljesjansane dine i OL?

– Eg ser ikkje bort frå det. Det spørst kven som overtek.

– Kven vil du helst skal overta?

– Det har eg ikkje tenkt så mykje på bortsett frå at Kristiansen er uaktuell.

Håvard Bøkko forsvarar ikkje trakassering av Maren Haugli i Berlin for tre veker sidan. Men han synest saka har fått altfor store konsekvensar og har skapt unødig mykje støy midt i sesongen.

– Det har vore fleire småting mellom Maren og Peter enn episoden i Berlin. Dette er ei sak som burde ha vore løyst internt straks og ikkje dukka opp gjennom media fleire veker etterpå, seier ein skuffa Håvard Bøkko.