Vedgår straffskuld etter hyttedrapet
25-åringen frå Østfold vedgjekk i Hallingdal tingrett i dag at han drap sambuaren på familiehytta i Gulsvik i juli fjor.
Ein 25-åring er tiltalt for å ha drepe sambuaren sin med 21 knivstikk. I dag møter han i Hallingdal tingrett. Der stiller også eit stort medieoppbod.
Mannen frå Østfold er tiltalt for drapet i familiehytta i Sørbølfjell i Gulsvik om morgonen 18. juli i fjor. I eit intervju med Hallingdølen i november sa han at han er førebudd på ei lang fengselsstraff.
Artikkelen held fram under annonsen.
– Eg gruer meg til rettssaka og møte med dei etterlatne, sa han.
LES OGSÅ: Forstår ikkje korleis han kunne drepe sambuaren: "Det er så meiningslaust".
Tilrekneleg
Då Hallingdølen møtte han i Ringerike fengsel, hadde han inga forklaring på kva som skjedde og kvifor. Han hugsa ikkje noko.
Politiets teori har vore at han frykta at sambuaren skulle gå ifrå han. Denne teorien er avvist av forsvararen hans, advokat Sindre Løvgaard. I føremiddag vil retten høyre mannens eiga forklaring. Rettspsykiatrane har konkludert med at han var tilrekneleg.
Kolliderte
Etter drapet stakk tiltalte frå hytta.
På Rv7 i Gulsvik kolliderte han med ein møtande bil. Han hadde 1,10 i promille. Han er tiltalt for promillekøyring og for å ha kollidert med bilen med vilje. Sjåføren i den andre bilen måtte køyre i fjellveggen for å unngå ein front mot frontkollisjon. Det er sett av fire dagar til rettsforhandlingane i Hallingdal tingrett. Retten blir administrert av sorenskrivar Stein Arne Vedde.