Tekne etter innbrot
To menn er arrestert etter innbrotet i Sparebank 1 i Gol i natt.
Dei braut seg inn i banken midt i Gol sentrum. Men politiet veit førebels ikkje om dei har stole noko der.
– Me veit heller ikkje kva dei var ute etter. Dei er enno ikkje avhøyrde, seier lensmann i Gol og Hemsedal, Brit Fyksen, til Hallingdølen torsdag morgon.
Artikkelen held fram under annonsen.
Store styrkar
Alarmen i banken vart utløyst ved 02.20-tida.
Politiet rykte ut, og fleire tilsette kom også til banken. Det var sett i gang ei omfattande jakt på ein mistenkeleg bil som var sett i området. Den sette kursen mot Nore og Uvdal, og det var her jakta gjekk føre seg.
I tillegg til politipatruljar frå Hallingdal og Kongsberg rykte ein hundepatrulje frå Oslo ut. Den vart sett inn i leitinga saman med politihelikopteret frå Gardermoem med varmesøkjande kamera. Jakta vart avslutta tidleg på morgonen. Då var begge tekne i Veggli.
Uvisst
Fyksen seier at politiet søkte gjennom bankbygget i natt, men at det førebels er uvisst om det er stole noko.
Kriminalteknikarar kjem til Gol i løpet av torsdag for å undersøke åstaden. Dei to mennene som er arrestert vart transportert til arresten i Hønefoss.