Samlar Geilo til eitt rike
Investorane og eigedomsutviklarane Arne Pålgardhaugen og Ivar Tollefsen kjøper Geilo Skisenter AS. - Ein draum, seier Pålgardhaugen.
Oppkjøpet vart gjort kjent onsdag morgon.
Det betyr at Pålgardhaugen gjennom Kikut Eiendom AS ,og Ivar Tollefsen gjennom Fredensborg AS, samlar utvikling av eigedom, næring og skiheisar. Det nye selskapet heiter Geilo Holding AS.
Artikkelen held fram under annonsen.
Etterlengta grep
Det nye selskapet blir ein sentral aktør på Geilo, med areal og skiheisar på Kikut, i Vestlia, Havsdalen og Geilohovda.
Geilingen Arne Pålgardhaugen, som har bygd opp Kikut og Geilo Fjellandsby, seier han må klype seg i armen over det han er med på.
- Som geilogut har det i alle år vore ein draum å samle kreftene for eigedom og spesielt for heis. No blir det realisert, seier Pålgardhaugen.
Draumen om å samle alle heisane har han hatt sidan han bygde den første på Kikut for 13–14 år sidan.
- Eg har alltid sagt at dette kjem til å skje. Men når, visste eg ikkje. No kan Geilo kome seg vidare. Dette er eit grep som har vore ønskt i lang tid, seier Pålgardhaugen.
- Kvifor skjer dette no?
- Realitetane har vorte tydelege for alle partar. Me er den destinasjonen i Skandinavia med størst potensial. Men dei fleste andre går frå oss, mens me står på staden kvil på heissida. Då er det opplagt kva ein må gjere.
To år
Pålgardhaugen seier dei første samtalene med Fredensborg AS og Ivar Tollefsen starta for to år sidan.
Artikkelen held fram under annonsen.
Men det var først i fjor sommar det vart fart i sakene.
- Det har vore ein aktiv prosess, og det har vore ei god oppleving og erfaring. Me er to partar som har funne saman, og me vil utfylle kvarandre på ein god måte med lik og ulik erfaring, meiner Pålgardhaugen.
- Det nye selskapet blir ein mektig aktør?
- Ja, og det skal me behandle med respekt.
- Har Geilo sakna ein slik aktør?
- Ja. Geilo har lidd veldig under at det ikkje har vore nokon slik aktør. Dette er etterlengta, seier Pålgardhaugen, og understrekar at det ikkje vil skje nokon heisrevolusjon over natta.
- Me startar på botnen. Men til neste år skal det vere ein skilnad på produktet. Me skal planlegge investeringane nøye.
Kraftsenter
Nøyaktig kva for investeringar som skal gjerast, er førebels ikkje kjent.
Artikkelen held fram under annonsen.
Det er heller ikkje prisen dei nye eigarane må betale for å kjøpe Geilo Skisenter. Målet er likevel klart:
– Me skal heve skisenteret og vere ein katalysator for næringsutvikling på Geilo og i Hol kommune. Me får ei viktig rolle, seier Pålgardhaugen.
Den same meldinga kjem frå Ivar Tollefsen og sonen Nick i Fredensborg AS.
- Det nye selskapet skal bli eit kraftsenter for utviklinga av området. Alt me gjer vil ha betydning for lokalsamfunnet, og me har eit genuint ønske om å levere positivt til kommunen, omgjevnadene og samfunnet.
- Handlar om Geilo
Oppkjøpet av Geilo Skisenter AS betyr samstundes at Bertel O. Steen og Lorentzen-familien sel seg ut etter tiår på eigarsida.
Lorentzen held fram i Geilolia Hyttetun og Geilolia Ferieleiligheter.
- Vemodig, seier dei, men meiner eit samla eigarskap av skiheisane vil gjere det mogleg å få meir ut av potensialet på Geilo.
Den bodskapen er Pålgardhaugen glad for å høyre.
Artikkelen held fram under annonsen.
- All honnør til dei. For dette handlar ikkje om personar, men om Geilo.
Me er den destinasjonen i Skandinavia med størst potensial.
Arne Pålgardhaugen
