No får ungane eiga nynorskavis
Hallingdølen er ei av fleire lokalaviser som er med på å lage verdas fyrste nynorske papiravis for barn og ungdom.
Denne veka sparka den nynorske ungdomsavisa Framtida.no i gang ei nynorsk nettavis for barn i alderen 7–13 år.
Lagar avis for ungar
Om nokre veker kjem nyskapinga også ut som papiravis, under namnet Framtida junior. Avisa skal innehalde alt frå kultursaker og boktips, til nyheits- og faktaartiklar.
Artikkelen held fram under annonsen.
– Me vil lage eit tilbod som er så spennande og godt at ungane vil ha lyst til å bruke det både på skulen og i fritida, seier redaktør Svein Olav B. Langåker.
Ei undersøking blant barneskular i nynorskområde syner at heile 97 prosent av kontaktlærarane ynskjer fleire digitale læringsressursar på nynorsk.
– Dette viser at det er eit stort behov for fleire tilbod på nynorsk, seier Langåker.
Det er Landssamanslutninga av nynorskkommunar (LNK), Framtida.no, Magasinett, ABC Startsiden og Samlaget som har tatt initiativ til storsatsinga. Oppstarten er støtta av både Kulturdepartementet, Utdanningsdirektoratet og Sparebanken Vest.
Hallingdølen med på laget
Det er Framtida som har ansvaret for papiravisa, med Langåker i spissen som redaktør. Men lokalavisene Hallingdølen, Hordaland, Os og Fusaposten, Sogn Avis og Sunnhordland deltek også i prosjektet, og skal levere redaksjonelt innhald til avisa.
– Det er moro å vera med på eit prosjekt der fleire aviser går saman for å nå unge lesarar. Målet er å lage ei landsdekkande avis med aktuelt stoff på nynorsk, skrive om og for barn og ungdom, seier redaktør Embrik Luksengard i Hallingdølen.
Vil auke samfunnsinteressa
Fyrste utgåve av avisa kjem som ein del av Hallingdølen laurdag 4. november. Utover det vil Framtida junior vera ei eiga abonnementsavis som kjem ut kvar 14. dag.
– Kvifor og korleis skal ei papiravis fenge ungar i denne alderen?
Artikkelen held fram under annonsen.
– Avislesing er ein måte å halde seg orientert i samfunnet på. Ungar og ungdom har masse meiningar og synspunkt. Difor meiner me dette er ein god arena, der dei kan lese om ting som dei alt er engasjerte i og ting som dei vil engasjere seg vidare i. Me vil skrive «vanlege» nyheiter, men leggje dei til rette for målgruppa. Det blir stoff både frå Hallingdal og dei andre involverte regionane, seier Luksengard.
