Luftige bilete
Pål Sundsøy frå Gol fotograferer norske perler frå fugleperspektiv.
– Filminga med drone er berre ein hobby. Men eg likar å sjå verda frå nye vinklar, fortel Sundsøy.
Dei siste vekene har han vore svært produktiv. Heile tre videoar har hanpublisert på kort tid.
Artikkelen held fram under annonsen.
– Eg har familie i Bremanger og dreg på besøk dit kvar sommar. Videoane redigerte eg på ein laptop på hytta, fortel han.
Åtte timars tur
Sundsøy bur no i Oslo, og på veg til Vestlandet la han inn ein stopp for å sjå Vøringsfossen. Der vart det sjølvsagt tid til å lufte dronen. I den spektakulære videoen kan me også sjå dei nye utsiktsplattformene som er laga i terrenget.
– Det kom mange asiatiske turistar som ville ta selfie med meg og dronen, humrar han.
I Bremanger tok han mellom anna turen opp på Hornelen, Europas høgste sjøklippe.
– Det er ein tur på åtte timar og me var tre som gjekk i lag. Eg bar dronen og fire ekstra batteri. Dei andre hadde med ekstra klede og nistepakke for meg.
Kvart batteri gir 20 minutt med flytid.
– Dei er ikkje veldig tunge kvar for seg, men alt utstyret veg nokre kilo til saman, forklarar han.
På reisefot
For Pål Sundsøy har fotografi lenge vore ein lidenskap.
Artikkelen held fram under annonsen.
– Det heile starta då eg budde i Sveits i 2005. Seinare har eg reist verda rundt i jobbsamanheng, då blir det litt tid til fotografering og, fortel han.
Han har vore spesielt mykje i Sør-Aust Asia og drøymer om å ta med seg dronen dit ein gong i framtida.
– Bagan i Myanmar er ein fantastisk plass som eg håpar på å kunne filme frå lufta.
Sundsøy har også laga dronefilm frå Gol og Hemsedal. Sjå den her:
