Hus brann ned til grunnen
Eit bustadhus i Hemsedal brann ned til grunnen natt til onsdag.
Nødetatane fekk melding om brannen kring 04.30 då ein nabo varsla om brannen i Hallsteinslåtta i Grøndalen.
Brannvesenet i Hemsedal og Gol rykte ut.
Artikkelen held fram under annonsen.
– Huset var overtent då brannvesenet kom fram. Taket var borte, seier branninspektør Kjell Arne Liahagen i Hallingdal brann- og redningsteneste.
– Var det fare for at brannen kunne spreie seg?
– Nei, det var aldri fare for det, seier Liahagen.
Då brannvesenet kom fram til det brennande huset, var det usikkert om det var personar i huset. Liahagen seier det tok litt tid før politiet fekk avklara dette, og tidleg onsdag morgon stadfesta politiet at verken huseigaren eller andre personar var i huset då det brann.
Årsaka til brannen er ukjend. Tomta er no sperra av, og politiet har sett i gang rutinemessig etterforsking og kriminaltekniske undersøkingar, opplyser regionlensmann i Hallingdal, Brit Fyksen.