Drap den einaste han elska

Den drapssikta mannen frå Østfold er nedbroten og fortvila.

I avhøyr på Hønefoss politistasjon onsdag ettermiddag var han svært lei seg.

– Han forstår kva som har skjedd, men han forstår ikkje at han har gjort det, seier forsvararen hans, advokat Sindre Løvgaard.

– Han er sett heilt ut. Han forstår ikkje at han har drepe den einaste personen som han elskar og er glad i, seier Løvgaard.

Erkjente

I politiavhøyr erkjente mannen i 20-åra frå Rygge at det er han som må ha drepe kjærasten sin i familiehytta i Sørbølfjell i Gulsvik.

Etter drapet drog han frå hytta, og kolliderte kort tid etter med ein møtande bil på Rv7 i Gulsvik. Ein av politiets teoriar er at han valde sjølv å kollidere. Det var mens han sat fastklemt i bilen at han fortalde redningsmannskap at kjærasten låg død på hytta.

Spørsmålet er kvifor han drap henne. Løvgaard vil ikkje kommentere det.

– Drap han i affekt?

– Det vil eg ikkje spekulere i, seier Løvgaard.

På hyttetur

Kjærasteparet som var vore sambuarar eit års tid hadde vore på hyttetur nokre dagar på Sørbølfjellet i Gulsvik, i hytta til familien hans. Tysdag morgon drap han henne, og drog frå hytta.

Etter kollisjonen på Rv7 vart han køyrt til Ringerike sjukehus, det vart også ei kvinne og ein mann i den møtande bilen. Dei hadde lettare skader. Den drapssikta hadde ikkje synlege fysiske skader. Men den psykiske tilstanden hans er dårleg.

– Eg har derfor bede om ei vurdering av den, seier Løvgaard.

Reint konkret dreier det seg om ei vurdering av om han var tilrekneleg i då gjerninga skjedde. Spørsmålet er om han var psykotisk eller hadde ein annan psykisk sjukdom. Han har vore teke hand om av helsevesenet til han blir framstilt for varetekt fredag. Politiet kan i varetektsmøtet foreslå eit mindre inngripande tiltak, som at han blir overlaten til helsevesenet i staden for å bli fengsla.

Undersøkingar avslutta

Politiet er ferdig med rundspørjinga i hyttefeltet i Sørbølfjellet, dei tekniske undersøkingane er også avslutta.

Den drepne kvinna er obdusert. Politiet vil ikkje gå ut med opplysningar frå obduksjonsrapporten.