Pålegg om kontroll av vassverk

Tre vassverk i Hol har fått pålegg frå Mattilsynet om å skjerpe rutinane for tilsyn og internkontroll.

Sudndalen vassverk, Hovet vassverk og Hol vassverk har fått likelydande pålegg.

Mattilsynet konstaterer at Hol kommune har etablert ein internkontroll, men at denne er mangelfull og ikkje i aktiv bruk.

Det er også berre delvis ført journal.

På den bakgrunn har Mattilsynet kome med følgjande pålegg, med 01.10.2010 som frist for gjennomføring:

n Hol kommune må etablere rutine for tilsyn og vedlikehald av høgdebasseng. Vasking av basseng må inngå i dette. Kommunen må også utføre journalføring over tilsyna sine.

n Hol kommune må etablere og setje i verk rutine for opplæring av tilsette i internkontroll.

n Hol kommune må etablere ein rutine for eigenrevisjon av internkontrollsystemet for vassverk.

Mattilsynet påpeiker at revidering av internkontrollen skal gjennomførast regelmessig og systematisk. Dette skal vere med å sikre at kommunen har styring og kontroll med vassforsyninga.

Distriktssjef Svein T. Furuhaug i Mattilsynet opplyser at dei har som mål at dei i løpet av året skal vere innom alle kommunar i dalen med tilsyn og revisjon av vassforsyninga.