To grader i barnehagen

Ungane må flyttast ut av småbarnsavdelinga på Ulsåk på dei kaldaste dagane. Langs golvet er det målt berre to plussgrader.

Del denne saka

Facebook

Digg

Småbarnsavdelinga Veslehødn ligg i eit gamalt hus med dårleg isolasjon.

FOTO: Bernt Ivar Bergum

I ei småbarnsavdeling på Ulsåk barnehage i Hemsedal har det i vinter vore ned mot to grader langs golvet.

I periodar er ungane flytta frå Veslehødn til andre avdelingar på grunn av kulde, seier styrar Solveig Rye Veslestølen.

14. januar fekk Miljøretta helsevern Hallingdal ei bekymringsmelding frå styraren.

Då hadde utetemperaturen vore låg lenge. På det kaldaste sette Hemsedal kulderekord med minus 39,5 grader.

Då vart det målt to grader langs golvet i småbarnsavdelinga Veslehødn.

– Me fyrer på så godt det let seg gjere, seier Odd Magne Anderdal, leiaren for eigedom i Hemsedal kommune.

Anderdal peiker på at det gamle husværet har dårleg grunnmur og lite isolasjon.

No bøter han på problemet med å plassere ut fleire omnar. I den kalde kjellaren har han sett opp ei varmevifte for å halde noko av kulda ute.