Støtte til Bergensbanen

Sju parti i Bergen bystyre støttar planen som kuttar reisetida på Bergensbanen til fire og ein halv time.

I dag brukar Bergensbanen mellom seks og ein halv og sju timar på turen Oslo - Bergen.

Det er ikkje urealistisk med ei reisetid på fire og ein halv time mellom Oslo og Bergen hevdar politikarar i sju parti i Bergen bystyre, og viser til Jernbaneverket sine framlegg til tiltak som kan korte ned reisetida betydeleg.

Det viktigaste er bygging av Ringeriksbanen som vil bety ein time mindre reisetid. Deretter er opprusting av Vossebanen, rette ut kurver på lina i Hallingdal og fleire kryssingsspor kombinsert med utbedring og bygging av plattformer tiltak som tilsaman kan redusere turen med 45 minuttar.

I tillegg vil effektivisering av ruteplan/togstopp og anna lineutbetring kunne gje ein innsparing på ein halv time.

I samband med klimatoppmøtet i København har poltikarane i Bergen samla seg om dette utspelet som er basert på Venstre sin aksjon "4-20-20" der målet er at reisetida er fire timar i 2020.

- Dette viser at når saka er viktig nok, kan me bli enige og lyfte den opp. Dersom me klarar å bli enige om Bergensbanen her lokalt, bør me klare det i Stortinget også, seier venstrepolitikar Sara Henriksen til Bergen Tidende.