Visst går det an

Nye Hallingdal Sjukestugu er ein realitet. Etter storutbygging var det torsdag duka for feiring og offisiell opning.

Hallingdal Sjukestugu, som i dag er ein del av Ringerike sjukehus, har alltid hatt ein sterk posisjon i regionen. Her var ein tidleg ute med å tenke utradisjonelt. I staden for å sjå på ei lokalisering i distriktet som ei ulempe, har ein sett på kva som kan vera gevinsten med ei lokalisering i Hallingdal. I staden for å krevje at pasientar må tilpasse seg stadig større sjukehuseiningar, har Ringerike sjukehus gått i bresjen for å tilpasse systemet til folks behov for helsehjelp.

Derfor tek ei rekkje ekspertar innan spesialhelsetenesta turen til Hallingdal nokre dagar, i staden for at mange hallingar må reise til Drammen eller Ringerike for behandling. Derfor er det investert i utstyr som gjer at pasientar får behandling lokalt. Og derfor er det etablert stadig nye tilbod innan spesialhelsetenesta. Dette er økonomisk og helsemessig fornuftig, og like logisk som genialt.

Tenkinga ved sjukestugu er dyrka fram gjennom mange år. Grunnlaget var derfor på plass då ein starta planlegginga av ei utbygging av sjukestugu. Ål kommune tok ei aktiv rolle som vertskommune og har gjennomført ei helseutbygging til over 300 millionar kroner i nært samarbeid med Vestre Viken helseføretak og dei andre hallingdalskommunane. Dette er samhandling i praksis, og nybrotsarbeid. Hallingdal sjukestugu har langt på veg blitt eit minisjukehus.

Hallingdal sjukestugu har fått nye lokale for fleire spesialhelsetenester. Det er bygd ei intermediær avdeling med 20 sengeplassar, der halvparten blir drive av Vestre Viken helseføretak og andre halvdel av hallingdalskommunane. Det er nye lokale for legevakt. I tillegg har Ål kommune parallelt bygd ut det kommunale helsetilbodet med ny korttidsavdeling med 16 plassar og like mange omsorgsbustader. Totalinvesteringa på vel 300 millionar kroner inkluderer både Hallingdal sjukestugu og helseutbygginga til Ål kommune.

Det var ikkje utan risiko, men rett og nødvendig, at Ål kommune tok ei leiarrolle i utbygginga. Med direktør Per Bleikelia ved roret på Ringerike sjukehus har kommunen kjent seg trygg. Han har ivra for modellen og utbygginga. Likevel veit ingen kva veg eit helseføretak tek i framtida. Men denne veka var det feiring av sjukestugu. Hallingdal og Vestre Viken kan vera stolt av resultatet.