annonse

Ny singel frå Per O. Noss

NY LÅT
NY LÅT: «Engel» er første singel frå plate nummer to som Per O. Noss gir ut. Albumet kjem 14. august.

Dei første låtane var klare sommaren etter debutplata. No har fem år gått, og Per O. Noss slepper første smakebit frå sitt nye album.

  • Torunn Akersveen Lied

– Av og til er det godt at ting får modnast så lenge, seier Per O. Noss.

Songaren frå Ål slepper i dag, fredag, singelen «Engel», første smakebit frå hans nye album Redningsmann som kjem 14. august. Fem år har gått sidan Noss gav ut debutplata «Hallingdølens kniv» i mars 2010. Mykje har skjedd sidan den gong.

– Tekstane og melodiane til «Redningsmann» begynte å komme alt sommaren 2010, og eg gjekk også i studio og spelte inn ein demo. På bakgrunn av den, fekk eg med Arvid Wam Solvang som produsent, han som mellom anna har produsert Maria Mena og Vidar Johnsen/Peter Nordberg, og me spelte inn ti låtar, fortel Noss.

Deretter tok musikaren pause. Han reiste, brukte tid på å gjere noko heilt anna, let materialet han hadde på gong modnast.

– Og plutseleg dukka det opp to låtar til. «Engel» er ei av dei. Det tok tid å skrive han, men så plutseleg losna det. Det er eg veldig glad for, og eg trur songen passar som førstesingel på eit album, seier Noss.

På «Hallingdølens kniv» låg elektro i botn med nokre live-instrument oppå. Singelen Engel, og albumet «Redningsmann», er bygd opp med fullt band frå botn av.

– Det har nok å gjere med at ein utviklar seg som musikar og songar. Det er jo det som er så moro med dette, seier Noss.